Kanhi mayor sa Compostela gitipi

GI-AMBUSH ug namatay ang kanhi mayor ug kanhi konsehal sa Compostela, Sugbo sa duha ka mga lalakeng nagmotorsiklo niadtong Lunes sa gabii samtang nagsakay sa iyang awto sa Sitio Lutaw, Brgy. Estaca sa nahisgutang lungsod.

Si kanhi mayor Joselito “Cocoy” Reynes, 62, taga Brgy. Cogon sa nahisgutang lungsod ug campaign manager ni Mayor Joel Qujiño sa miaging eleksyon, nadali pa untag dala sa kapulisan sa Compostela sa Danao District Hospital ug gibalhin sa tambalanan sa dakbayan sa Sugbu apan gideklarar nga dead-on-arrival tungod sa tulo ka mga samad sa iyang lawas.

Ang duha ka mga killer wa pa mailhi sa kapulisan.

Si Cebu Provincial Police Director Sr. Supt. Erson Digal niingon nga nibilar sa ilang si Reynes uban kang Mayor Joel Quiño ug nipauli sakay sa iyang puwa nga Hyundai (YCI 103) dihang gi-ambush mga alas 10:50 niadtong Lunes sa gabii.

Na-recover sa kapulisan sa crime scene ang tulo ka mga kabhang sa bala nga 9mm pipila ka metros gikan sa sakyanan sa biktima, samtang tulo ka mga buslot agi sa bala diha sa walang bintana sa sakyanan.

Gihulma gilayon sa kapulisan sa lalawigan sa Sugbo ang Special Investigating Task Team diin si Digal ang mangulo uban sa Provincial Investigation and Detective Management Branch (PIDMB), Criminal Investigation and Detection Group (CIDG-7) ug PNP-Crime

Laboratory 7.

Si Chief Supt. Lani-O Nerez, director sa Police Regional Office (PRO-7), niduaw sa Compostela ug sa buhatan ni Digal nakigtagbo kang Quiño sa CPPO kagahapong adlawa uban sa lima niini ka mga konsehal.

Si Nerez nihatag og duha ka mga police escort kang Quiño nga magbantay kaniya nga temporaryo sulod sa usa ka bulan, samtang sa mga konsehal gi-assess pa nila ang threats sa hulga sa ilang tagsa-tagsa ka kinabubhi.

Si Nerez nipasabot nga gihatagan nilag police escort si Quiño subay usab sa ilang pagtan-aw sa sitwasyon nga ma secure ang mayor ug kapugngan ang bisan unsa pa unyay sunod nga mahitabo.

Giklaro niya nga di pa gyud sila makasulti kon ang motibo sa krimin may kalambigitan ba sa isyu pulitika.

Subay niini, gibutyag ni Nerez, nga dunay upat ka mga tawo nga ilang giimbetar kagahapong adlawa human sa krimin.

Samtang si Mayor Quiño nga niatubang sa mga sakop sa media nipadayag nga di pa siya makasiguro nga 100 percent nga pulitika ang hinungdan, apan possible kaayo kini.

“Wala koy ma-pinpoint nga tawo pero sama sa uban dunay maabot sa atong mga panghuna-huna kay kon moingon tang personal, mas grabi tong sa una naagian sa biktima,” sumala pa ni Quiño

Siya niingon nga human sa election tensyunado ang lungsod sa Compostela hinungdan nga siya mismo ni-awhag sa iyang mga supporter nga magpabilin magmabugnawon ug mosunod sa balaod.

Sumala pa niya nga dihang nagsingabot ang election dunay mga balay sa iyaang mga supporter nga gipamusil.

Gipahibawo niya nga si Reynes, gawas sa iyang pagka-campaign manager, kini maoy nagtabang niya sa ilang mga lakaw sa kaulohan labot sa apelasyon nila sa Comelec batok sa ilang kaatbang sa pulitika nga si kanhi Mayor Retchie Wagas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph