LAING duha ka mga lalaki ang nilanding sa balay tambalanan human nahulog sa gisaka nga lubi sa managlahing dapit.

Unang biktima ang manananggot nga mao si Alfredo Legazpi, 60, taga lungsod sa Medina, Misamis Oriental.

Nahitabo ang insidente niadtong Martes mga alas 9:00 sa buntag dihang misaka sa lubi ang biktima. Adlaw-adlaw na niining trabaho ang pagsaka og lubi apan samtang anaa na sa taas sa punoan kalit lang kining wala makahawid ug deretsong nahulog.

Dili makabakod ang biktima ug kritikal ang kahimtang niini nga daling gidala sa Northern Mindanao Medical Center (NMMC) ning siyudad sa Cagayan de Oro.

Samtang nahulog usab si Rodrich Ramoga, 18, ulitawo, taga Barangay Magkarila, lungsod sa Talisayan, Misamis Oriental.

Nagsaka sa lubi si Ramoga niadtong Martes mga alas 2:00 sa hapon aron manguha og butong apan nadigyas ang biktima ug deretsong nahulog.

Bun-og sa lain-laing parte sa lawas ang naangkon niini hinungdan nga daling gidala sa Talisaysan District Hospital.

Apan giduso sa Northern Mindanao Medical Center (NMMC) ning siyudad tungod sa grabeng naangkon niini.

Ang mga biktima padayon pang giatiman sa mga doctor ning panahona. (SVB)