DUHA ka mga bata ang pulos nilanding sa balay tambalanan human nabanggaan og motorela sa managlahing dapit ning siyudad sa Cagayan de Oro.
Giila ang unang biktima nga mao si Elizar Barrioga, 3, taga 31th Nazareth ning siyudad kinsa nabanggaan niadtong Martes mga alas 5:40 sa hapon si Barrioga sa motorela nga gimaneho ni Teofanes Araco, taga Kauswagan ning siyudad.
Gisaysay sa driver nga kalit lang nga mitabok sa dalan ang bata hinungdan sa pagkasapon niini. Nalatayan ang lawas sa biktima hinungdan sa grabeng bun-og sa lawas ang naangkon niini.
Daling gidala sa Northern Mindanao Medical Center (NMMC) ang biktima ug padayon pang giatiman sa mga doctor.
Samtang gidala usab sa susamang tambalanan ang 13 anyos nga giilang si Jonathan Yañez, taga Justo Ramonal, Camaman-an ning siyudad.
Nasayran nga gikan pa sa iyang tunghaan sa City Central School sa Velez St., ning siyudad dihang mitabok ug naligsan sa motorela.
Ang driver sa motorela nga mao si Arterio Ligtas, taga Consolacion ang nidala usab pagdali niini sa NMMC.
Gibutyag niini nga mga alas 3:00 sa hapon kalit lang nga mitabok sa dalan si Yañez hinungdan sa pagkaligis sa tiil ug natamakan sa ligid.
Nasayran usab nga busy kayo ang dalan niadtong tungora ug wala na namatikdan sa driver ang biktima.
Hinuon ning panahona wala gipasagdan sa mga motorela driver ang mga bata ug giabagan ang biktima sa balay tambalan diin padayon pa nga giobserbahan sa mga doctor. (Stephanie V. Berganio)