NIADTONG Martes gisugdan ang rehistro sa mga botante alang sa umaabot nga piliay sa Barangay election ug Sangguniang Kabataan (SK) karong umaabot nga Oktubre 25, 2010.

Daghan nga mga tawo ang gilaumang moabot sa buhatan sa Commission on Elections ning panahona.

Usa ka personahe sa city Comelec ning siyudad sa Cagayan de Oro nibutyag sa Sun.Star SuperBalita nga alang niadtong mga tawo nga mobotar alang sa barangay election gisugdan Martes ug gilaumang matapos karong umaabot Agusto 13. Ang oras sa pagpangrehistro magsugod sa sa alas 8:00 sa buntag ngadto sa alas 7:00 sa gabii.

Usa sa mahimong himuon sa mga botante mao ang pagparehistro kon bag-ong botante, transfer of registration, pag-ilis sa ngalan o correction of entries of name, reinstatement sa ngalan sa list of voters ug inclusion sa registration records.

Bisan kinsa ang mahimong morehistro basta nag-edad na og 18 anyos pataas samtang ang botante nga nagparehistro nga wala pa nag-edad og 18 anyos apan mag-edad na og 18 anyos sa Oktubre 25 makonsidera nga registered voters.

Ang gusto nga magparehistro magdala sa dokumento nga nagpamatuod sa iyang identity sama sa IDs.

Samtang alang sa rehistro sa Sangguniang Kabataan elections kini sugdan karong Biyernes ug matapos sa August 15 gikan sa alas 8:00 sa buntag ngadto alas 7:00 sa gabii.

Kinahanglang nag-edad og 15 anyos apan ubos sa 18 anyos sa Oktubre 25, 2010; residente sa barangay sulod sa unom ka bulan sa dili pa ang eleksiyon. Usa sa gikinahanglan nga dokumento mao ang birth certificate o school records.

Gipanawagan sa Comelec nga magrehistro na ug dili na magpaabot nga matapos ang gihatag nga skedyul aron malikayan ang paghuot sa buhatan sa Comelec. Padayon pa nga gikumpirma kung madayon ang eleksiyon karong Oktubre. (Stephanie V. Berganio)