SAKTO ba ang sukli nga gihatag kaninyo sa mga tindahan matag higayon nga duna kamoy paliton?
Dunay mga drug stores, shopping malls ug ubang tindahan nga sa higayon nga mobayad na ang mga consumers sa ilang gipalit nga mga butang, ang sensiyo nga ihatag kanila kuwang og 25 o dili kaha 50 sentabos.
Sa libuan ka mga consumers nga mag-shopping matag adlaw, dako na kining kantidad.Sa usa ka buwan dako sila og matigom.
Apan kun ang mga consumers gani ang magkuwang og 25 o dili kaha 50 sentabos dili mosugot ang store attendant. Mao kini ang problema ug di ba klaro man kini nga pagpanlimbong?
Kaniadto ang ilang gibuhat mao ang paghatag og candy alang sa kantidad nga kuwang o wa nila mahatag. Apan dihang gidid-an sila, giundang sa mga tindahan ang maong pamaagi.
Obligado ang mga tindahan nga mag-andam og daghang sensiyo aron isukli sa mga pumapalit ug dili sakto nga rason nga kuwang ang ilang gihatag tungod kay nagnihit ang sensiyo.
Dugay na kini gibuhat sa mga patigayon ug dako-dako na sab ang gikita nila. Hinuon, di pa klaro kun gitugot ba kini nga pamaagi sa mga tagdumala o tag-iya sa mga tindahan.
Maayo siguro nga mandoan sa Department of Trade and Industry ang mga patigayon nga ihatag ang sakto nga sensiyo sa mga pumapalit. Kun dili maghigpit ang DTI magpadayon ang tinonto.