USA ka 10 anyos nga bata naangol sa bag-ohay nga nahitabong engkwentro didto sa probinsiya sa Maguindanao.

Nailhan sa kapulisan ang biktima nga si Sambra Salingab, ug molupyo sa Barangay Macasendig, Pikit, North Cotabato.

Sigun sa taho gikan sa 6th Infantry Division sa Philippine Army, nga banda alas 4:50 sa hapon, Hulyo 3, gisulong sa gibana-banang 30 ka mga miyembro sa lawless Moro Islamic Liberation Front (MILF) group ang detachment sa Citizen Armed Forces Geographical Unit ug sa 29th Infantry Battalion sa Philippine Army didto sa Barangay Reyna Rigente, Datu Piang.

Apan dali nga nakabantay ang puwersa sa kagamhanan hinungdan nga miulbo ang 25 minutos nga sinukliay og mga bala tali sa duha ka mga grupo.

Miatras ang mga rebelde paingon sa Liguasan Marsh sa diha nga gipabuthan sa mga sundalo og 90 RR Bazooka.

Atol sa engkwentro, dunay nasaag nga bala sa 81 mm Mortar nga didto mitugpa duol sa usa ka tulunghaan hinungdan sa pagka-angol sa 10 anyos nga bata.

Walay gitahong samaron sa mga sundalo ug Cafgu samtang wala pa matino kun duna bay nakalas sa mga rebelde.

Gibutyag ni 6th ID Colonel Benjamin Hao nga grupo ni Kumander Tatah Puti sa LMG maoy nangulo sa pagpangatake kinsa gitumbok sab nga nalambigit sa masaker sa Sitio Masalay, Barangay Salman, Ampatuan, Maguindanao. (Edgardo Fuerzas)