POLITIKA ang gilantaw nga motibo sa paglabay og granada sa bay sa usa kanhing lokal nga opisyal sa Maguindanao sa alas 8:32 sa gabii niadtong Martes didto sa siyudad sa Cotabato.
Gibutyag ni Cotabato City Police Director Willie Dangane nga duha ka mga wala mailhing suspetsado sakay sa kolor pula nga XRM nga motorsiklo ang kalit miitsa og granada sa bay ni kanhi Parang Maguindanao Municipal Mayor Talib Abo sa Oblate Drive, Barangay Rosary Heights 7.
Walay nasamdan sa pagbusikad sa eksplosibo gawas lamang sa pagkaguba sa garahe ug mga igo sa shrapnels sa granada sa duha ka mga sakyanan, apil na ang pagkabuak sa salamin sa bay ni Abo.Hinuon, way tagbalay nga nasamdan sa hitabo.
Dali sab nga misibat ang mga suspetsado paingon sa wala matino nga direksyon sa diha nga ilang namatikdan nga niresponde ang mga otoridad.
Gikompirma ni Dangane nga sa wa pa nahitabo ang pagbuto sa granada, nagtigom ang pamilyang Abo kabahin sa ilang isang-at nga reklamo ngadto sa Commission on Elections (Comelec) batok sa kaatbang sa mayor nga miparot kaniya sa milabay nga piniliay.
Nakalakaw na si Abo sa dihang nahitabo ang pag-itsa og granada kay didto siya natulog sa iyang ikaduhang bay.
Gimando dayon ni Cotabato City Mayor Japal Guiani sa kapulisan nga ang imbestigasyon sa hitabo aron mailhan ug madakpan ang mga suspetsado. (Edgardo Fuerzas)