USA ka drayber og tricycle sa siyudad sa Digos ang gitulis sa tulo ka mga lalaki kinsa nasikop atol sa manhunt operation nga gilusad sa Digos City Police Office (DCPO).

Banda alas 2:40 sa hapon, Lunes, sa dihang gitulis si Jim Carlo Elaya, 21, ulitawo ug lumolupyo sa Luna-Bataan, siyudad sa Digos.

Si Elaya nisumbong sa DCPO nga siya naglakaw sa dalang Luna Tandang Sora sa dihang nibutho ang mga de-motorsiklong suspetsado kinsa armado og mubo nga armas.

Gipahunong siya sa mga suspek, matud ni Elaya, ug dayon nideklarang "hold-up" samtang ang usa ka kanila nanion og pistola. Gikuha dayon ang iyang salapi nga anaa sa iyang bulsa nga nikantidad og P400.

Abtik nga nikagiw ang mga tulisan padung sa wa masutang direksyon. Apan ang grupo ni Inspector Melvin Violan nga nakadawat sa alarma nigukod dayon sa mga suspek.

Sa ila nang tagsa-tagsa ka panimalay nasikop ug nailhan ang mga suspek nga mao sila si Ramil Sarmineto, 22, ulitawo, taga Purok Kaimito, Punta Biao; Juan Bualan, 22, ulitawo sa Chapter 4, Barangay Aplaya; ug Jeffrey Abella, 25, minyo ug lumolupyo sa Purok Banahaw, Punta Biao sa maong siyudad.

Nakumpiska sa otoridad ang usa ka paltik nga .22 kalibre nga pistola (Germany made), nagbaton sa serial number 66192 ug adunay kargada nga 6 ka mga buhing bala, stainless hunting ug kuwentas nga matud pa "trabungko" (amulet).

Nakuha sab gikan sa posisyon ni Abella ang duha ka sticks sa gituohang dahon sa pinaugang marijuana.

Gumikan sa mga ebidensiya nga nakuha gikan kanila gihan-ay dayon sa kapulisan ang kaso nga ipasaka kanila.

Si Police Officer 2 Benjie Gemina maoy gitahasan sa DCPO sa dugang interogasyon kon unsay kalabutan sa tulo sa uban pang kasong tulis nga nahitabo sa siyudad. (Orlando B. Dinoy)