MAS mitaas pa ang ihap sa kasong dengue sa probinsiya sa Davao del Sur. Kini human nadugangan ang mga biktima sa mga napaakan og "aedis egypti" kun lamok nga nagdala sa kagaw sud lang niadtong buwan sa Hulyo.

Base sa datos gikan sa Provincial Health Office (PHO), niabot na sa 844 ang mga tawong natakbuyan sa dengue human nadugangan og 244 sa maong bulan.

Niining unang semana sa Agosto, walo ka mga bata ang nagpabiling gitambalan sa Davao del Sur Provincial Hospital, apil dinhi ang 4 anyos nga si Arjay Bacamante, lumolupyo sa dakbayan.

Si Totong, amahan sa bata, nagkanayon nga "on and off" ang hilanat sa iyang anak mao nga sa iyang kabalaka iya dayong gidali pagdala sa tambalanan.

"Pagkuha nako sa result sa check-up nag-positive gyud siya sa dengue," niya pa.

Gikan 600 gikan buwan sa Enero hangtud Hunyo, 12 ka mga biktima ang namatay samtang nadugang sa miaging buwan ang kapin 200 ka mga kaso ug 124 nila nagagikan sa siyudad.

Si Dr. Azucena Dayanghirang, Provincial Health Officer, nagbutyag nga mas gipakusgan pa nila ang information dissemination karong bulana human nga halos kada adlaw na mobundak ang kusog nga uwan ug mapundo ang mga tubig sa mga kanal.

Nakig-alayon na sab ang PHO ngadto sa mga pribadong ospital aron pahibaw-on sila kon ugaling mosaka pa ang ihap sa ilang mga pasyente nga na-dengue.

Ang Davao del Sur daan nang gipaubos sa state of calamity tungod sa nahitabong pag-ulbo sa dengue nga gideklara sa PHO.

Subling naghangyo ang PHO ngadto sa katawhan nga magkugi sa pagpanglimpyo pinaagi sa pagyabo sa mga tubig nga mapundo sa mga ligid ug uban pang butang nga mamahimong ma-itlogan sa mga lamok.

Alang sa PHO, nga ang kahinlo sa palibot mao ra gyud ang bugtong paagi aron nga mapakgang ang pagkuyanap sa sakit nga dengue. (Orlando B. Dinoy)