SAMA sa gilauman, gipanglampornas sa University of Cebu (UC) Webmasters ang kuwangan kaayo’g tawo nga University of San Carlos (USC) Warriors, 89-65, sa main game niadtong Martes sa 2010 Cebu Schools Athletic Foundation Inc. (CESAFI) college division sa Cebu Coliseum.
Sa sayo pa, ang Warriors nakahukom na unta nga dili na lang mosalmot karong tuiga tungod kay pito ra ang ilang mga magduduwa nga makapakita og aksyon.
Unom sa ilang mga sakop nga sila si Jabe Bautista, Eddie Bakker, CJ Napoletano, Alfie Almirante, Nico Magat ug Mel Duran ang nanga-disqualify atol sa pag-screen sa line-up gumikan sa academic nga rason.
Aduna pa unta’y siyam ka mga sakop nga nahabilin ang Warriors apan nius-os pa gyud kini sa pito kay adunay angol si Giovannie Padillo ug adunay chicken fox si Jun Cantonao.
Hinuon gipasabot ni Warriors coach Mike Reyes nga ningduwa na lang sila bisa’g pito ra ang ilang mga sakop gumikan kay nausab ang desisyon sa management nga gipangulohan nila ni vice president Fr. Ernesto Lagura SVD ug athletic director Rolando Sanchez.
Ang Webmasters ningpahimulos sab gyud sa dakong haw-ang sa Warriors ug pinaagi sa pagpangulo sa ilang higanteng si Junmar Fajardo, nakaposte sila og 21 puntos nga labaw sa 3rd quarter.
Sa sayong bahin, nakasukolsukol pa unta ang Warriors apan wala gyud sila nakalahutay sa ngadto-ngadto tungod sa kakuwang nila’g mga magduduwa.
Gipangulohan nila ni Fajardo ug Kelvin Juliane ang kadaugan pinaagi sa ilang 17 puntos kada usa samtang ang Warriors gipangulohan ni Sam Hermosa pinaagi sa iyang 24 puntos.
Sa laing bahin, langkaton og suway sa Southwestern University (SWU) Cobras ang sayong liderato sa college division sa ilang pagpakigharong sa University of Southern Philippines Foundation (USPF) Panthers sa main game karong hapon sa Cebu Colisuem.
Ang Cobras nasubhan og impresibong kadaugan batok sa University of San Jose Recoletos (USJ-R) Jaguars, 65-59.
Sa premirong duwa, magsangka ang UC Baby Webmasters ug Sacred Heart School Jesuits-Ateneo de Cebu (SHSJ-AdC) Magis Eagles sa high school category.