MAAYO kay naminaw sa public opinion si Mayor Mike Rama. Kay kon siyay pabut-on dili niya gustong ihinayon ang plano ni Vice Mayor Joy Augustus Young nga mopalit og mga karaan og kagang-kagang nga eroplano gikan sa Department of Education. Pero dili pa gyod ko mokalawat sa pamahayag ni Mike kay aduna man goy kina-iya ni siya nga molikoy.
Kanang usab-usab ba og huna-huna. Pero angayan natong daygon ang baruganan sa mayor.
REAKSIYON
Ania koy nadawat nga reaksiyon kabahin sa plano ni Vice Mayor Young nga mopalit og kagang-kagang nga mga eroplano. Gikan kini kang Manuel Bulawan, usa ka Bisdak apan atoa na manarbaho isip aircraft mechanic sa Singapore.
Super Bob;
Usa ako ka mekaniko sa eroplano diri sa Singapore Super Bob.
If you can still remember me, I was one of the guys nga nag-strike sa Philsca-Mactan para kontrahon ang pagkakurakot sa kanhi Campus Director nga si Col. Duran way back in 1994 man tingali to. Ang maong strike gi-coveran ni Bong Soriano ug ikaw maoy nag-anchor niadto nga didto pa kamo sa Bombo Radyo.
Anyway, Super Bob, gusto lang akong mo-react aning plano ni Vice Mayor Joy Augustus Young nga mopalit og eroplano gikan sa Department of Education. It’s nice to hear baya nga gusto mopalit og aircraft ang city government alang sa maong katuyuan. Apan nganong kanang karaan man intawon uy.
Kanang Helios aircraft sa akong pagkahibawo, experimental na.
Ug karaan naman tawon na uy. Panahon pa god na sa Vietnam war.
Nanghambog pa to sila nga maka-take off sa usa ka tennis court. Unya unsaon man paglanding?
Okey atong uyunan ang ilang ideya nga himulbulan ang uban aron gamiton sa usa, puwede ra siguro i-frame o kanang lawas ug kalabira sa eroplano. Kanang iyang body. Apan ang makina dili na puwede ug karaan gihapon. Ug kay obsolete naman nang maong eroplano wala na na siyay piyesa bisan kanang simple nga gasket o rings sa makina.
Ang iyang maayong buhaton, diha nalang sa Mactan Airbase magbuhi siya og Nomad, C 130 ug HU-IH, nakakita man siguro mo anang gipangparking diha sa rampa sa Air Force puwede kaayo nang i-revived pero ang problema lang piyesa. Maayo unta nga manghearing-hearing pod unta ang bise mayor sa dili pa magpataka og yawit sa iyang baba. Basin huna-huna niya nga tabanog nang iyang paliton.
(bobby@sunstar.com.ph)