NEGUSYANTENG babaye uban sa iyang driver gi-ambush sa duha ka mga wa mailhing mga tawo nga nagsakay og motorsiklo didto sa dakbayan sa Mandaue kagahapon sa buntag.

Ang driver anaa sa kritikal nga kahimtang human maigo sa pagpusil, samtang ang iyang amo nga wa unta maigo gidala gihapon sa ospital human mapantok ang agtang sa paglayat niya sa sakyanan.

Updates on President Benigno Aquino III's presidency

Kapulisan nitutok karon sa duha ka mga anggulo sa ilang imbestigasyon sa ambush kagahapon sa mga alas 8:55 sa buntag sa may Sityo Pilit, Brgy. Cabancalan, dakbayan sa Mandaue.

Una, personal nga motibo samtang ang ika-duha may kalabotan sa negusyo sa biktima. Wa usab isalikway sa kapulisan nga ang driver maoy tuyo sa mga gunman hinungdan nga lakip kini sa ilang gisusi.

Ang mga biktima giila sa kapulisan nga sila si Sony Boy Mahilum, 28, ulitawo ug stay-in driver sa iyang amo nga Debbie Yu, 55, minyo, taga Paseo Annete, Maria Luisa Village, Brgy. Banilad, dakbayan sa Sugbo.

Si Yu tag-iya og lending firm ingon man gikatahong namaligya og marine products.

Matod sa kapulisan nga ang ang duha ka mga biktima sakay sa usa ka Toyota Fortuner (YJD-315) nga gimaniho ni Mahilum.

Sa imbestigasyon sa Criminal Investigation Detective Management Branch (CIDMB), ang duha paingon na sa unta sa DRGB Import Export Inc. nga gipanag-iya ni Yu sa Brgy. Cabangcalan.

Sigun sa mga saksi nga ang duha ka mga gunman nagsakay sa motorsiklo nga Yamaha DT-125, diin ang duha pulos nag-full face helmet ug pulos nag-jacket og kolor itom ug maroon.

Si PO3 Tirso Plania, imbestigador sa Station-6 diin nahisakop ang Barangay Cabangcalan, niingon nga unang nakit-an ang duha ka mga gunman nga nag-parking kilid sa tulay.

Ang ilang sunod nga nakit-an nga nagsunod na sa sakyanan sa mga biktima ang duha dayog pusil kanila sa makadaghang mga higayon.

Ang driver maoy naigo sa ulo ug lawas samtang si Yu wa maigo apan gikatakdang operahan ang ulo tungod sa giingong pagkabunal sa karsada sa dihang nilayat sa iyang sakyanan atol sa pagpamusil.

Gipasabot ni Plania nga nakadagan pa ang sakyanan bisan kon naigo na si Mahilum.

Nilayat si Yu ug nahunong lang ang sakyanan human mabangga sa usa ka backhoe nga nag-parking kilid sa karsada mga 20 metros ang gilay-on gikan sa iyang kompaniya.

Human sa hitabo, ang mga gunman nideritso na sa pagpadagan paingon sa Brgy. Pagsabungan.

Nakuha gikan sa crime scene ang siyam ka mga kabhang sa bala ug usa ka slug nga gituohang bala nga 9 MM nga gituohang gikan KG-9 submachine pistol.

Si Mandaue City Police Director Senior Supt. Noel Gillamac niingon nga duha karon ka mga anggulo ang ilang gisusi.Una, kontra sa mga biktima ug ika-duha may kalabotan sa negosyo ni Yu.Ang duha daling gidala sa Chong Hua Hospital sa dakbayan sa Sugbo.

Sa pagsuwat ning taho, si Mahilum naa pa sa kritikal nga kahimtang.

Si Gillamac niingon nga ang iyang City Investigation Detective Management Branch pinangulohan ni Chief Insp. Elmer Fernandez aduna nay gisunod nga mga tawo nga posebling may kalabotan sa kremin.

Aduna nay mga saksi nga ila karong gidapit sa ilang buhatan.(DRT)