PATAY ang driver ug konduktor sa usa ka bus dihang giatangan ug gipamusil sa mga armado kagahapon mga alas 4:00 sa kadlawon boundary sa Bukidnon apan sakop pa sa Wao, Lanao del Sur.
Diha-diha nga nakabsan sa kinabuhi sila si Ronnie Poblacion, taga Pangantucan, Bukidnon kinsa nagmaneho sa bus sa Rural Transit Mindanao Inc. (RTMI).
Patay usab ang konduktor nga mao si Cat Steven Nacorda, taga Kitaotao, Bukidnon. Samtang kritikal ang kahimtang sa inspektor nga nailang si Margarito Joel Igagarao.
Nasayran gikan kang Yasmin Villaflor, personahe sa RTMI nga nahinabi sa Sun.Star Superbalita nga gikan pa sa Wao ang bus nga nagdala og body number 2546 dihang paghidangat sa boundary nga bahin sa Bukidnon apan sakop pa sa Wao, kalit kining giatangan ug gipara sa mga armadong lalaki.
Sa pagtuong mosakay ang mga suspek gihunongan kini sa driver deretso nga gipusil ang mga biktima sa ilang ulo hinungdan sa hinanaling kamatayon. Apil sa gipusil ang inspektor nga anaa niadtong tungora. Human sa insidente daling misibat ang mga suspetsado.
Matud ni Villaflor nga blanko pa ang buhatan sa RTMI sa motibo sa pagpamusil labina nga si Poblacion ug Nacorda niadtong petsa uno pa sa Agusto nagsugod pagmaneho ug bag-o pa kini na-hire.
Wala sab gikatahong kaaway sa duha. Giingong dili sab motibo ang pagpanulis kay wala man hilabti ang mga pasahero niini ug walay mga kantidad nga nakuha. Tumong lamang sa mga suspek mao ang pagpatay sa driver ug konduktor.
Mitumaw usab ang taho nga ang maong bus nga susamang body number ang giingong nakabangga-patay sa duha ka mga Maranao sa dapit apan padayon pa kining gisuta ning panahona.
Hinuon ang kaso karon giatiman pa sa Lanao del Sur Police Office. (Stephanie V. Berganio)