USA ka midwife mipatala sa kapulisan human siya nabiktima sa mangingilad didto sa dakbayan sa Panabo, pasado alas 10:00 sa buntag niadtong Miyerkules.

Nailhan ang biktima nga mao si Leizel Cabillo, hamtung ang panuigon, ug molupyo sa Purok 9, Barangay Cagangohan siyudad sa Panabo.

Sumala sa sumbong sa biktimang si Cabillo nga nakutlo gikan sa blotter sa kapulisan nga usa ka nagpailang Diamale Aceran, ang nanghuwam kaniya og kuwarta balor P18 mil niadtong milabay nga bulan kay ilang ikapital sa ilang duha ka mga tukurong negusyo.

Apan natingala na lang si Cabillo sanglit wa na nagpakita kaniya ang suspek ug wa sab negusyo nga mitumaw.

Natingala si Cabillo sanglit ang iyang gi-invest nga P18 mil alang sa negusyo nahanaw daw sama sa bula.

Sa kabalaka midangop na lamang ngadto sa buhatan sa kapulisan si Cabillo, aron magpatabang.

Kapulisan sa siyudad sa Panabo mihimo na karon og dugang imbestigasyon sa hitabo.

Gilusad na sab ang manhunt operation aron sa pagpangita sa suspek. (Marvin Pineda)