USA ka indian national gitulis sa wa mailhing mga armadong suspek didto sa Sityo Baybay, Barangay Magnaga, lungsod sa Pantukan, Comval Province, Lunes sa buntag.
Nailhan ang biktima nga mao si Bredjit Singh, 40, molupyo sa siyudad sa Tagum.
Sa report gikan sa Tagum City Police Station, nasuta nga pasado alas 8:30 sa buntag nangulekta si Singh sa nangutang niya sa maong dapit apan kalit lamang nga miduol kaniya ang duha ka wa mailhing mga lalaking sakay sa usa ka Suzuki Raider nga motor ug gitiunan og armas dayon sa pagdeklara og tulis.
Wa nay nahimo ang biktima ug nakuha sa mga suspek gikan kaniya ang iyang kuwarta nga mibalor og P2 mil.
Human makuha ang tuyo, mga suspek misibat gilayon padulong sa wa matino nga lugar sakay sa ilang get-away nga motor.
Hinuon ang plate number sa motor nga gigamit sa mga suspek nakuha sa biktima ug gi-beripika na sab kini ngadto sa buhatan sa Land Transportation Office sa siyudad sa Tagum.
Kapulisan sa lungsod sa Pantukan misusi na og dugang imbestigasyon sa maong hitabo. (Marvin Pineda)