USA ka Indian National gitulis sa wa mailhing mga suspetsado didto sa Purok 10, Barangay Maniki, lungsod Kapalong, Davao del Norte, Miyerkules sa buntag.

Nailhan ang biktima nga mao si Jaswinder Singh, hamtung ang panuigon, ug molupyo sa Mabini Street, Barangay Magugpo South, siyudad sa Tagum.

Sa report gikan sa Tagum City Police Station nasayran nga pasado alas 9:00 sa buntag samtang nangolekta ang biktima sa iyang mga gipautang didto sa maong lugar, kalit nga miduol kaniya ang duha ka wa mailhing mga tawo.

Gitionan og armas sa mga suspek ang biktima dayon sa pagdaklara og tulis.

Sa kahadlok nga pasakitan, napugos na lamang ang biktima sa pagtugyan sa iyang kuwarta balor P2 mil nga iyang mga nakolekta.

Wa pa natagbaw ang mga suspek, ila sab gikuha ang Suzuki Raider nga motor sa biktima dayon sibat padulong sa wa matino nga lugar.

Gisulti sab sa biktima nga wa gayud niya namay-ungan ang mga suspek sanglit nagtaptap sila og panyo sa nawong.

Si Singh midangop na lamang ngadto sa buhatan sa kapulisan.

Mga sakop sa Kapalong Municipal Police Station mihimo na karon og dugang imbestigasyon sa hitabo.

Samtang gipanid-an na sab sa mga otoridad kung unsa nga grupo ang nagtulis sa biktima. (Marvin Pineda)