USA ka dalaga nakit-an na lang nga patay na human naghikog sa alas 4:00 sa hapon niadtong Miyerkules didto sa probinsiya sa Cotabato.

Nailhan sa kapulisan ang biktima nga si Honalyn Sideno, 37, usa ka saleslady ug molupyo sa Purok 2, Barangay Osias, Kabacan.

Sa nahagpat nga taho gikan sa Cotabato Police Provincial Office, nasuta nga sayo nga miuli ang biktima gikan sa trabaho ug mideritso sa comfort room sa bay sa iyang ig-agaw.

Natingala ang iyang pamilya ngano nga dugay kaayo siyang migawas hinungdan nga gipugos sila nga buksan ang kasilyas. Dako na lang ang ilang kakurat sa diha nga nagbula na ang baba ni Sedino kay miinom diay og pestisidyo nga pang-spray og insekto sa basakan.

Daling gisapupo ang biktima ug gidala sa Kidapawan Doctors Hospital apan gideklara sa mga doktor nga dead on arrival.

Matud ni Belen nga nagpakamatay ang iyang ig-agaw unom ka adlaw una gipusil patay ang iyang live-in partner nga si Vic Hulao.

Gituohan nga wa siya maka-aguwanta sa iyang sobrang kahasubo sa pagtipi sa iyang kapuyo nga maoy hinungdan nga nakadesisyon siya nga kutluon ang iyang kinabuhi.

Ang kapulisan sa Kabacan padayong nag-imbestiga sa maong hitabo. (Edgardo Fuerzas)