USA ka mag-uuma ang gipusil patay sa mga armado sa alas 3:40 sa hapon niadtong Miyerkules didto sa probinsiya sa Maguindanao.

Nailhan sa kapulisan ang biktima nga si Zaiden Antuja, 44, minyo ug molupyo sa Barangay Kulambugan, Sultan Sabarongis.

Sigun sa taho gikan sa Maguindanao Police Provincial Office, nga samtang didto sa iyang uma ang biktima, kalit lamang mibutho ang mga armadong lalaki ug gipusil siya gamit ang M16 armalite rifle.

Patay gilayon si Antuja nga natusak-tusak sa mga bala ang lawas samtang mga suspetsado dali nga misibat paingon sa wala matino nga dapit.

Matud ni Baidido, nga sa wa pa gipatay ang iyang bana nakasulti siya nga dunay naka-away kining grupo gumikan sa bingkil sa yuta nga ilang giugmad.

Gitguohan usab nga gipatay ang biktima sa mga rebelde gumikan kay paryente siya ni Vice Mayor Sukarno Badal nga kaaway ni Kumander Maestro Felmin sa MILF.

Ang kapulisan padayon sa ilang imbestigasyon aron nga masayran ang tinuod nga motibo sa pagpatay sa mag-uuma sa ingon nga masikop ang mga suspek. (Edgardo Fuerzas)