SI COTABATO City Mayor Japal Guiani gihulgang patyon gumikan sa iyang hugot nga pagpatuman sa balaod.
Bag-ohay lamang nakadawat og sulat si Guiani sa mga nagpailang operator ug drayber sa mga traysikel sa siyudad.
Kahinumduman nga gipangdakop sa Traffic Management Unit (TMU) ang mga payong-payong nga traysikad ug mga traysikel nga nagbiyahe gawas sa ilang rota.
Ang sulat gipadala mismo sa buhatan ni Guiani nga dunay sulod nga usa ka bala sa 9mm pistol ug nagkanayong "Isang bala ka lang Mayor."
Nagbahad ang nagpadala sa suwat nga kun padayon silang dakpon sa mayor molusad sila og pagpamomba sa dakbayan.
Matud ni Guiani nga wala siya gibati og kahadlok tungod kay ang iyang gihimo mao lamang ang tinuoray nga pagpatuman sa balaod.
Niadtong milabay nga adlaw, gimugna ang Task Force "Right of Way" batok sa mga ilegal nga terminal, ilegal vendors ug ilegal gambling nga gikasuko sa maong grupo.
Hugtanon nga seguridad karon ang gipahamtang sa militar ug kapulisan aron kapugngan ang paghimo og samok sa mga armadong grupo. (Edgardo Fuerzas)