TUNGOD sa pagpatuman sa Motor Vehicle Users Charge (MVUC) nga mag-obliga sa tanang mga operators sa pagbayad og dugang P2,000 sa pagparehistro sa ilang mga sakyanan, ang Transmission-Piston nagbahad nga maglusad og laing protesta batok sa maong balayrunon nga gipatuman sa Land Transportation Office (LTO).

Kini ang banta nga giluwatan ni Transmission-Piston spokesperson Edil Gonzaga sa Superbalita atol sa ilang gihimong press conference kagahapon.

Si Gonzaga nagbutyag nga tungod sa bag-ong usbaw sa MVUC, ang tricycle operators gimandoan karon nga mobayad og dos mil pesos, mas dako og deperensiya sa kanhi nilang gibayran nga P300 samtang ang multicab ug jeepney kinahanglang mobayad og dos mil pesos gikan sa kanhi nilang gibayaran nga P600.

Gawas sa maong balayrunon, suma ni Gonzaga, ang LTO nagpatuman usab sa laing balayrunon sama sa giingon nga inspection fee nga P300 alang sa mga filcab operators, P150 alang sa single motorcycle operators ug P600 alang sa mga operator sa truck ug bus.

Sa suwat pamahayag ni Gonzaga, mga militanteng sector sa transportasyon subling nanawagan sa LTO ug sa administrasyong Aquino nga rebokahon ang Executive Order 197 ug repasuhon ang Republic Act 8794.

"The higher MVUC is, indeed, too much for the drivers and operators. Our daily income have dried up by periodic oil price hikes and increases of price of basic commodities," pung ni Gonzaga.

Ang pagpatuman sa MVUC sa tibuok nasud pinasikad sa EO 197 ug RA 8794 nga nagmando nga ang tanang kita sa gobyerno gikan sa MVUC gamiton alang sa pagpaayo sa mga kalsada.

"Nganong kita man intawong mga kabus ug walay klarong kita ang pabug-atan og samot sa gobyerno? Nganong dili man resolbahon sa Aquino administration ang kurapsiyon aron ang kwarta sa katawhan magamit sa pagpaaayo sa mga kalsada?" pangutana ni Gonzaga.

Si Gonzaga nagkanayon nga dako na ang gikita sa gobyerno gikan sa kasamtangang balayrunon nga gikolekta sa LTO mao nga di na kinahanglan pa nga ipatuman pa ang MVUC. (AD)