LAHI ug mas na-improved na nga Rey “Boom-Boom” Bautista (28-2m 21 KOs) ang makita nga moaway karong Agusto 28 sa Waterfront Hotel and Casino sa Lahug, dakbayan sa Sugbo.
Ubos sa pinakadakong promotions sa ALA Boxing gym sulod sa tulo na ka tuiga nga giulohan og “Philippines versus The World,” si Bautista makigsinukliay sa iyang kinumo batok sa Mexicanong si Alejandro Barrera (20-3, 13 KOs), ig-agaw ni Marco Antonio Barrera.
Si Bautista gisaway sa mga kritiko nga kuwang og depensa ug way footwork apan ning higayona gituohan nga mausab na ang style niini tungod sa ilang bag-ong conditioning coach nga si Pio Solon, gradwado sa UP Diliman.
“Ang conditioning training namo nakatabang og dako sa among pagbalance ug pagpalig-on,” matod sa 24 anyos nga lumad nga taga Candijay, Bohol atol sa press conference kagahapono sa Sports Exchange Bar and Restaurant sa Mango Square.
“Dako kaayo ko’g respeto sa mga Mexicano kay sila may permi ka pildi nako, mao nga gipangandaman ni nako og maayo. Wa na koy problema sa injury sa akong kumo,” dugang niya.
Sama kang Bautista, si Milan Melindo miangkon nga dako gayud kaayo og natabang ang ilang conditioning training nga maoy iyang magamit batok sa South Korean nga si Jin Man Jeon.
Ang trainer nga si Edito Villamor mibutyag nga nakadugang gayud sa kusog sa kumo ni Milendo ang conditioning training nga ilang gipahamtang.
“Among gipangutana ang iyang permi gika-sparring, moingon man nga di na ka kompiyansaan si Milan,” padayag ni Villamor.
Si Jimrex Jaca (30-6, 15KOs) kinsa gikan pa sa Thailand miangkon nga wa siya makasuway sa conditioning training.
Apan matod niya nga ang iyang pagsigi og sparring didto sa Thailand maoy naghatag kaniya og kahanas. Sa maong promosyon, iyang ikasangka si Pepino Cuevas, Jr. , ang anak sa usa ka inilang boksingero sa tibuok kalibutan nga si Pepino, Sr.
Si Pepino Jr. (14-5, 12 KOs), mao ang kanhi WBC Latino Super Featherweight champion.
Mopakita usab og aksiyon ang kanhi world champion ug ang giilang “Little Pacquiao” nga si Florante Condes batok sa Indonesian nga si Sofyan Effendi, ang PABA Interim Minimum champion.
Lakip sa blockbusting card mao ang away ni Marlon Alta batok sa Hapon nga si Naozumi Tsuchiyama ug ingon man ang most requested fighter nga si Jun Intor nga makigtigi ni
Jaime Alin Jr.
“We plan to bring world class boxing in the Philippines especially in Cebu. If they have Las Vegas then we have Cebu,” matod ni Michael Aldeguer, ang presidente sa ALA Boxing Promotions.