MAORAG maghilak na man ang adlaw kon way ambush nga mahitabo.

Ning nakalabay lang nga duha ka mga adlaw, duha gyud ka high-profile nga mga ambush ang nahitabo.

Updates on President Benigno Aquino III's presidency

Una ang sa Compostela diin namatay ang kanhi mayor sa lungsod ug ang ikaduha mao ang nahitabo sa Mandaue city diin negusyanteng babaye ang gisuwayan sa pagpatay.

Bisan pa sa pagkasulbad sa ubang dagkong mga krimen, way puas ang mga patay.

Manghimakak man ang mga local official, ang kahimtang sa kahusay ug kalinaw dinhi sa Sugbo makatay-og gyud sa business sector.

Dagkong mga negusyante mismo ang mingpadayag sa ilang kabalaka tungod kay ilang pipila ka mga kauban ang nangabiktima.

Si Debbie Yu ang labing uwahi nga negusyante ang gibirahan apan suwerte kay wa siya maigo sa pagpusil.

Ang pagsiaw sa mga pagpatay usa ka timailhan sa kapakyas sa kapulisan sa pagpakgang sa mga krimen.

Di igo ang pagsulbad sa krimen. Mas epektibo ang pagpugong nga mahitabo kini.

Makahimo man sila og lakang kon molihok lang gyud kanunay, di kay tiyempo-tiyempo lang o kon ganahan sila.

Kini pinaagi sa pagpahigayon kanunay og checkpoints sa bisan unsang oras sa adlaw.

Ikaduha mao ang pagpakatap og dugang mga pulis sa kadalanan.

Hayan ning duha ka mga paagi, magpanagana ang mga kriminal sa paghimo sa krimen. Di kini makasumpo, apan makapaminos.

Ikatulo mao ang intelligence gathering nga angay pang palig-unon unta og maayo aron matumbok, mapakgang o kaha mahipos sa sayo pa kining mga grupo sa mga kriminal sa di pa sila makahimo og tinunto.