ASSET sa Philippine Drug Enforcement Agency (PDEA) gipusil-patay sa kagahapon sa kaadlawon sa sityo Tunga, Tangke, Talisay City.
Gituohan nga nagnegusyo og drugas ang nipatay sa biktima kay nailhan na siyang asset sa anti-drug agency.
Naila ang Tangke nga usa sa mga grabe og suliran sa pagpamaligya og drugas di lang sa Talisay City, kon di sa Metro Cebu.
Daghan nang nisuway sa pagsumpo sa drugas nga naghitak sa mao nga barangay apan pulos nangapakyas.
Natusaktusak sa mga bala ang lawas ni Jerome Villoria, 29, taga Barangay San Roque, dihang gipusil sa wa mailhing mamumuno.
Si P02 Leandro Azarcon, sakop sa homicide section sa Talisay City police station nitug-an sa Sun.Star Superbalita nga nisud sa sityo Tunga, Tangke ang biktima alas 2:30 kagahapon sa kaadlawon ug didto tirahi dapit na sa baybayon.
Nagtuo si Azarcon nga nagbinugtong nga nisud sa maong dapit si Villoria hinungdan nga yano kining gipatay.
Gipahibawo ni Azarcon nga ang ig-agaw ni Villoria nga si Winlog Villoria, gipusil sab sa Tangke niadtong Hulyo 29 apan suwerte kay igo lang nasamdan ug nakadagan.
Nailhan na ang manag-agaw sa maong dapit nga sila mga asset sa PDEA hinungdan nga gikontrahan sila sa mga nagnegusyo og shabu.
Kagahapong adlawa, si Winlog nipakita sa police station ug nitug-an sa mga imbistigador nga duna siyay gidudahan nga maoy namusil sa iyang ig-agaw.
Si Azarcon nagtuo sab nga ang nipusil kang Winlog mao ra sab ang nipatay kang Jerome kagahapon.
Nakaangkon og mga samad sa iyang ulo, tuong abaga, tiil ug tiyan si Jerome hinungdan sa iyang kamatayon.
Nakuha sa kapulisan ang upat ka mga kabhang sa bala nga gituohang kalibre .45 ang armas nga gigamit sa mamumuno.
Tungod sa sunod sunod nga mga pagpamusil nga nahitabo sa Barangay Tangke, si Supt. Henry Biñas, hepe sa kapulisan sa Talisay, makig-coordinate sa mga opisyal sa maong dapit aron pakisayran kon daghan bang mga lumolupyo ang armado.
Susihon sab ni Biñas kon ang mga suspek sa mga pagpamusil notado ba sa maong dapit.