LIMA ka testigos ang gihuptan karon sa kapulisan nga nag-identify sa gunman nga nipusil patay kang kanhi Compostela Mayor Joselito Reynes niadtong Lunes sa gabii.
Kini maoy gibutyag ni Cebu Provincial Police Director Sr. Supt. Erson Digal subay usab sa ilang padayong pagpangita sa gunman kinsa nilayas na ug wa na gyud nipatim-aw human sa krimen.
Wa hinuon mahinayon ang pagpasakag kasong murder kagahapong adlawa batok sa gunman sanglit tulo pa lang ka testigos ang nakadusog affidavit sa piskaliya kay nalangay sa pag-abot ang ubang mga saksi.
Gusto ni Digal nga ang tanang testigos makaduso sa ilang affidavit batok sa suspek.
Si Digal kinsa nangulo sa Special Investigating Task Team miingon nga ang Criminal Investigation and Detection Group (CIDG-7)Regional Intelligence Division (RID) Provincial Investigation and Detective Management Branch (PIDMB) nagpadayon sa manhunt batok sa gunman.
Matod pa ni Digal nga sa panahon nga ilang madakpan ang gunman, ila usab nga mailhan unya ang driver nga kuyog niini sa pag-ambush kang Reynes.
Si Digal nimando usab sa iyang mga sakop nga pangiton ang usa ka motorsiklo nga kolor puwa nga XRM nga giingong maoy gisakyan sa duha ka mga killer.
Si Mayor Joel Quiño kinsa personal nga niduaw sa buhatan ni Digal kagahapon sa buntag nalipay sa dagan sa imbestigasyon sa kapulisan sanglit mahatagan na og kasulbaran ang pagpatay ni Reynes.
Hinuon gipadayag ni Quiño nga ang mga suspek nagtrabaho sa iyang kaatbang sa pulitika.
Gibutyag niya nga ang biktima dunay gipasakang kaso diha sa buhatan sa Ombudsman Visayas batok kang kanhi Mayor Ritchie Wagas niadtong Enero sa miaging tuig labot na sa gipapasar sa namatay nga resolution.
Kabahin kini sa tulo ka mga tseke nga nagkantidad og P280,000 nga gibayad sa usa ka ka babaye diin gipa-rediscount sa black market.
Wa hinuon sila masayod kon unsay trabaho ning maong babaye, matod ni Quiño.
Giangkon niini nga human sa pag-ambush patay kang kanhi Mayor Reynes, nakadawat siyag hulga sa kinabuhi pinaagi sa text message nga nagkanayon “daghan pang adlaw…ug dili mo mangundang anang inyong pagkatikasan… nahipos na ang usa... Kaw sunod.”
Si Digal sa iyang bahin nagkanayon nga dili pa gayud sila makasulti kon ang motibo sa krimin pulitika ba o personal sanglit nagpadayon pa sila sa ilang imbestigasyon.
Samtang si kanhi Mayor Ritchie Wagas nga nahinabisa dySS Super Radyo niangkon nga kanhi job order employee ug driver sa ambulansiya sa lungsud sa Compostela si Wilson Pasaul.
Kini maoy gipadayag ni Wagas human si Pasaul ang usa sa mga gidapit sa kapulisan human sa krimin.
Apan gipanghimakak ni Wagas nga iyang close-in security si Pasaul tungod kay wa siya magtiner og bodyguard sa dihang siya pa ang mayor sa lungsod sa Compostela.
Nihangyo ang kanhi mayor sa kapulisan nga nag-imbestigar sa kaso nga tan-awon ang tanang anggulo ug di lang pulitika isip motibo kay siya mismo nanghinaot sa dinaliang kasulbaran sa kaso ug mahatagag hustisya ang kamatayon ni Reynes.