DUHA ka mga tinun-an ang gipugos pagpasulod sa van ug gidagit sa mga naka-bonnet ug armadong lalaki niadtong Huwebes mga alas 4:30 sa hapon atubangan sa tunghaan sa Puntod Elementary School ning siyudad sa Cagayan de Oro.

Nakalingkawas gikan sa mga kidnapper ang duha ka mga bata nga gitaguan sa pangalan nga Ian, 12 ug Dino, 9, pulos residente sa Culrai, Puntod ning siyudad.

Gisaysay ni Dino sa interbyu sa usa ka sibyaan sa radyo nga pauli na unta sila niadtong tungora gikan sa klase dihang kalit lang gihunongan sa usa ka van nga

kolor puti ug adunay kombinasyon nga kolor pula.

Ninaog ang duha ka armadong lalaki gikan sa sakyanan ug gitionan og kutsilyo ang duha ka bata ug gipugos nga gipasulod sa van sa bahad nga lubaon.

Nakurat ang duha ka mga biktima dihang pagtan-aw sa sulod sa van nga aduna nay tulo ka mga bata nga gituohang mga rugby boy. Nagsabot ug nagplanong sukmagon

ang kidnaper ug moambak sa van ang mga biktima.

Paghidangat sa Kauswagan nga bahin ning siyudad misukol ang tulo ka mga bata ug gitabangan ang mga armadong lalaki. Tungod sa nahitabong bugno, nakahigayon si

Ian ug Dino pag-ambak gikan sa van hinungdan nga nakaangkon og grabeng bun-og sa lawas ug pangos."Wala nami nakabalo sa among buhaton kay gikulbaan na kaayo mi," ni Dino.

Nasayran nga naakambak gihapon ang tulo ka minor de edad gigukod pag-usab sa mga armado.

Niini naukay ang katawhan sa hitabo labina ngadto sa mga ginikanan nga adunay mga anak nga nagtungha.

Sa iyang bahin ni PO3 Neil Delas Alas, imbestigador sa Police Station 5 (PS5) sa Macabalan nibutyag sa Sun.Star Superbalita nga nakapaalarma ang maong insidente apan ning panahona padayon pa nga gihimo ang masusing imbestigasyon labina niadtong duha sab ka minor de edad nga naka-ikyas aron madugangan ang

pag-ila sa mga suspetsado.

Gipasabot usab niini nga sa matag tunghaan sa ilang area kanunay adunay nakabantay nga mga polis apan nahitabo ang insidente gawas na kaayo sa tunghaan

ug anaa na sa highway nga bahin. (Stephanie V. Berganio)