KUNG duna kay sakyanan mag-atubang ka og sakit sa ulo tungod sa lainlaing mga requirements ug bayranan nga kinahanglan imong tumanon kun buot mo nga makadagan ang imong behekulo.
Kun duna kay taxi nga usa o duha ka unit pananglit, malipong ka sa mga bayrunon,
Kini ang rason ngano nga ang uban nawad-an og gana sa maong matang sa negosyo kay labad sa ulo.
Karon kay panahon sa ting-rehistro nangalot na sab sa way katol nga ulo ang mga operators kay mitaas na ang bayranan sa rehistro.
Tungod sa pag-usbaw sa bayranan sa rehistro, mga sakop sa Transmission-Piston nagbahad nga mowelga.
Ang gimulo sa Transmission-Piston mao ang usbaw sa gisingil sa Land Transportation Office nga P2 mil alang sa Motor Vehicle Users Charge (MVUC).
Ubos sa pamaagi karon, ang usa ka Tricycle operator mobayad na og P2 mil gikan sa kanhi P300. Ang P600 nga kanhi maoy gibayaran sa mga operator sa multicab ug jeepney nahimo na usab karon nga P2 mil.
Apan wa nahuman dinhi ang ilang kalbaryo. Mobayad usab sila og laing P300 nga inspection fee alang sa mga filcab operator, samtang P150 alang sa single motorcycle ug P600 alang sa mga operator sa truck ug bus.
Kun sumahon, hilabihan gyud kabug-at sa bayranan.
Mao kini ang hinungdan nga ang Transmission-Piston nagplano nga mowelga.
Ang sama niini nga pamaagi maayong tun-an karon sa mga kadagkoan sa LTO aron dili malisdan ang katawhan. Di man sab tingali moalma ang katawhan kun sakto lang ang bayranan apan kun dako na gani, klaro nga pagpanapi na kini.
Dureza
Miresayn na si Sec. Jess Dureza isip Minda Chair aron paghatag og higayon kang Presidenti Noynoy Aquino nga magbutang og iyang tawo. Sa pagka karon naghuwat na lamang si Sec. Dureza nga matudlo ang ipuli kaniya tungod kay di man sab maayo nga biyaan lang niya dayon ang posisyon nga wa pay mopuli.
Sumala sa taho nga atong nabati, dunay tulo ka mga tawo nga intresado sa katungdanan ni Dureza. Daghan kanato nasayud nga sa panahon nga dunay dagkong hitabo sa Mindanao nga nakaapekto sa kalinaw ug kahusay, atua si Dureza sa eksena nga nangulo sa mga otoridad sa pagpangita og solosyon.
Usa lamang kini sa mga buluhaton ni Sec. Dureza.
Ato kining gihisgutan gumikan kay ang ipuli kang Dureza kinahanglan nga dili mahadlok nga mosud sa mga apektado sa problema nga mga lugar sa Mindanao. Dili kini lalim nga tahas ug gikinahanglan ang tawo nga sensiro sa katungdanan, isog ug adunay baruganan.