USA ka miyembro sa Special Civilian Volunteers Organization (CVO) sa pamilyang Ampatuan misurender sa mga otoridad alas 3:00 sa hapon niadtong Huwebes didto sa probinsiya sa Maguindanao.

Nailhan sa kapulisan ang suspek nga mao si Batukan Saligo, 43, minyo ug molupyo sa Barangay Poblacion, Datu Hooper Ampatuan.

Si Maguindanao Police Provincial Director Marcelo Pintac nagsulti nga si Saligo apil sa mga sinaligan ni Datu Unsay Mayor Datu Andal Ampatuan Jr. nga dunay patong sa ulo nga P250 mil nga gilambigit sa masaker sa Sitio Masalay, Barangay Salman, Ampatuan.

Gitahan ang suspek sa iyang pamilya ngadto sa kapulisan sa kahadlok nga siya mapatay sa gilusad nga operasyon sa kapulisan uban ang militar.

Gikompirma ni Pintac nga ilang gi-imbistigar si Saligo aron matumbok ang mga lugar nga gitagoan karon sa iyang mga kauban.

Apan gitin-aw ni Bainot nga usa lamang ka CVO ang iyang paryente nga nagsunod sa bisan unsang mando sa iyang amo, ug kon di sila mosunod posible sab nga siya ang tipi-on.

Gi-estudyuhan pa sa mga otoridad ang giluwatang pahayag ni Saligo kinsa nagsulti nga andam siyang mahimong testigo batok sa mga tawo nga gilambigit sa Maguindanao.

Sa kasamtangan mas gipalig-on ang operasyon sa militar ug kapulisan batok sa mga Private Armed Group ug mga suspek sa masaker. (Edgardo Fuerzas)