USA ka drayber ug konduktor sa de pasaherong bus sa Rural Transit of Mindanao Incorporated (RTMI) ang namatay human gipusil sa mga armadong tawo alas 3:40 sa kaadlawon niadtong Huwebes didto sa lungsod sa Wao, Lanao del Sur.
Naila ang mga namatay nga sila si Ronnie Poblacion, 44, minyo, drayber sa RTMI bus nga nagbatun sa body number 2546 ug ang konduktor nga si Catsteven Nacorda, ug pulos molupyo sa probinsiya sa Bukidnon.
Matud ni Police Senior Inspector Antonino Ebot, hepe sa kapulisan sa Wao, nga duha ka wala mailhing lalaki ang misakay sa maong bus sa maong lungsod ug kalit nga gitionan si Poblacion og kalibre .45 nga pistola.
Misulay sa pagsukol ang drayber sa maong bus apan giluthang siya sa suspek lakip na ang konduktor kinsa pulos naka-angkon og samad sa ilang ulo.
Gidugang pa ni Ebot nga gipusil sab sa mga suspek ang inspector sa maong bus nga nailhang si Mario Igagamao nga nasamdan sa iyang nawong.
Gidugang ni Ebot nga posibling dili pagpanulis ang motibo sa maong krimen tungod kay wala gikuha ang kuwarta sa konduktor ug bisan sa mga pasahero.
Sa pagkakaron, blangko pa ang kapulisan sa motibo ug pagtumbok sa mga suspek sa maong krimen. (Edgardo Fuerzas)