39th Infantry Battalion naghangyo mga menor bantayan sa mga ginikanan

ANG 39th Infantry Battalion (IB) nagpahimangno sa mga ginikanan nga bantayan ang ilang mga anak nga di malingla sa mga rebeldeng New People's Army (NPA) ilabi na kadtong nagpuyo sa kabukiran.

Di pa dugay, nahitabo ang pagtahan sa duha ka mga rebeldeng lalaki, usa kanila menor, ngadto sa mga otoridad niadtong Hulyo 28 human mibiya sa kalihukan sa mga rebelde.

Sila gikostudiya na sa 39th IB.

Napamatud-an sa kasundalohan nga nang-rekrut og mga menor ang NPA human nasayran nga ang kauban sa 26 anyos nga miampo nga si Roger Parasa, nagpangedaron pa lang og 17 anyos nga mao si alyas Niño.

Pulos lumolupyo sa lungsod sa Magsaysay, Davao del Sur ang duha ug nisulod sa NPA ilawom sa Committee Front 72 sa pagpangulo ni Manuel Fernandez kun "Ka Bobong."

"Daghan sila mga pangako alang sa amoa pero bisan usa wa nila natuman, mao nisurender na lang mi," ni Parasa.

Subay sa rekord sa 10th Infantry Division, 56 na ka mga NPA ang nibalik sa sabakan sa gobyerno gikan buwan sa Enero hangtud ning kasamtangan. Pito kanila pulos mga menor de edad nga napamatud-ang gigamit isip child combatants.

Gipahayag ni Niño nga aduna pay nahibiling 3 niya ka mga kaubang menor didto sa kalihukan ug gibansay sa mga NPA aron mamahimong child warrior.

Si bag-ong nilingkod nga 39th IB commanding officer Lt. Col. Oliver Artus, nagkanayon nga sagad himuon sa mga NPA mao ang paghaylo sa ilang mga rekrut nga adunay daghang benepisyo silang mahatag.

Gikostudiya sa militar ang duha sa kahadlok nga patyon sila sa ilang mga kaubang rebelde.

Gihangyo sab sa kasundaluhan ang mga ginikanan nga i-monitor kanunay ang ilang mga anak aron di mahitumpawak sa hiwing dalan. (Dondon Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph