USA ka habal-habal drayber nasikop sa kapulisan human nasakpang naghupot og marijuana didto sa lungsod sa Sto. Tomas, Miyerkules sa hapon.
Nailhan ang dinakpan nga mao si Jumar Villacinco, 24, ug molupyo sa Feeder Road 3, Barangay Tibal-og, lungsod sa Sto. Tomas.
Sa report gikan sa Davao del Norte Police Provincial Office nasayran nga pasado alas 3:45 sa hapon nasikop sa mga sakop sa Sto. Tomas Police ang suspek human nasakpang naghupot og pinalaya nga dahon sa gituohang marijuana nga giputos og mantalaan didto sa checkpoint sa kapulisan.
Nasakmit gikan ni Villacinco ang 0.4 ka gramo nga gituohang pinalaya nga dahon sa marijuana nga iyang gitaguan sulod sa iyang bag.
Ang suspek nagmaneho sa iyang habal-habal sa dihang nasikop sa mga otoridad.
Gidala dayon ngadto sa presinto sa kapulisan ang dinakpan samtang ang kasong paglapas sa RA 9165 kun Comprehensive Dangerous Drugs Act gihikay na sa kapulisan batok sa dinakpan. (Marvin Pineda)