TUNGOD sa pagtuo nga di mabilanggo ang mga menor de edad, gigamit na sila karon sa sindikato sa pagpamaligya og droga, sigun ni Philippine Drug Enforcement Agency (PDEA) deputy director Emerson Rosales sa Superbalita.
Ang pahayag ni Rosales miguwa human nasikop ang usa ka alyas Jomar (bansagon gitago), 17, niadtong Miyekules didto sa Bo. Pampanga, siyudad sa Davao.
Si Rosales nagbutyag nga si Jomar maoy gisugo ni alyas Astri sa pagbaligya og shabu ngadto sa mga nagtakuban nga buyer og shabu nga sakop sa PDEA.
Sila Astri ug Jomar, suma ni Rosales, maoy tumong sa mga ahente sa PDEA human nadawat ang impormasyon nga ang duha namaligya og shabu didto sa Bo. Pampanga, Lanang sa alas 10:15 sa gabii niadtong Miyerkules.
Sa maong operasyon, bugtong nasikop mao si Jomar sanglit nakaikyas si Astri dihang nakamatikod nga mga ahente diay sa PDEA ang mipalit kanila og shabu.
Si Rosales nagbutyag nga nakuha nila gikan kang Jomar ang usa ka pakite sa shabu nga nagkantidad og P80,000 nga gipabaligya kaniya ni Astri.
Si Astri gipangita na karon aron sikupon ug bilangguon tungod sa pagpamaligya og gidili nga droga.
"Palagay nila, kung minor ang mahuli hindi makulong kaya mga minors ang kanilang inutosan na magbenta. Makulong parin ang minor na suspect kung ma-establish na may discernment siya sa paggawa ng illegal activities," pung ni Rosales. (AD)