KON nakamatikod mo daw nagtakodtakod ang kasong pagpamanhig dinhi karon sa ato. Sa ato pa daghang kaso sa ambush ang gisusi karon sa kapulisan. Dinhi sa Metro Cebu area lang daan di basta basta ang mga tawo nga gi-ambush.
Mga promininting negusyante ug karong bag-o mga opisyal sa gobyerno. Nakahigayon ko og pangutana ni Sr. Supt.
Patrocinio Comendador labot niini atol sa usa ka presscon.
Matod sa direktor sa kapulisan sa dakbayan sa Sugbo, nga ang target nga maoy nagmaneho sa sakyanan sayon ra kaayong tirahon.
Siguro ang mga killer nakakita og dakong purohan nga matuman ang ilang plano kong naa sud sa sakyanan ang ilang target.
Tambag ni Comendador niadtong nagduda nga dunay mopatay kanila, magmatngon sa inyong mga lakaw.
Ayaw patuyang. Planoha. Labaw sa tanan usab usaba ang inyong mga rota. Pero ang pinaka importanti, i-report sa kapulisan kong naa ka ning maong problema.
INTERVIEW
Sa mga sakop sa media ilabi na sa mga beat reporters, ang pulong ambush komon kaayo.
Kong masipyat ka og paminaw unya di suheto sa mga termino sa mga reporter ikaw ang kuyawan kong maghisgut sila og ambush.
Pananglit, usa ka heneral naa sa sud sa Social Hall sa Kapitulyo kay mitambong og Regional Peace and Order Council meeting, unya dunay mga reporter nga nagpundok sa gawas.
Makaagi ning maong mga reporter nga ilang ambuson ang heneral , kuyawan ka. Espoko nimo na, heneral ambuson unya ikaw pa gyud ang nakadungog sa plano.
Naanad man gud ta sa minubo. Imbes ambush interview, kutob ra sa pulong ambush ang mogawas sa baba. Ako ning gihisgutan kay usahay kining mga estorya sa uban nga di kompleto makapalabad sa ulo sa naminaw. Mensahi ni sa atong mga kaigsuonanan nga modangop sa kapulisan kay duna silay gustong itug-an nga impormasyon.
Sayod ko nga problema ni kanunay sa atong mga imbestigador. Mga impormasyon nga kulang sa unod, wa pa maluto apan giha-on.
Busa kadtong may kasayuran sa usa ka krimen, palihug ayaw ninyo dungagi o kuhai ang inyong nasayran labot niini. Personal nga kasinati-an nako nahitabo didto sa Compostela.
Ang mga tawo nga akong na-interview nga gituhoang may kasayuran sa kaso, lainlain og sugilanon ang gipaambit. Ang kasayuran nga akong nahipos sa interview lain sab ang gitug-an ngadto sa kapulisan. O ang gitug-an diri nako sayop, apan ang gitug-an ngadto sa kapulisan maoy duol-duol sa tinuod. Unsaon man ni nato pagbalanse.
Ang itom himoong puti, ang puti himoong itom. Hinuon, ang sulbad niini nahasandig na sa abilidad sa imbestigador o sa reporter nga nangapkap og kasayuran.