USA ka barangay official sa kasadpang bahin Sugbo ang gihulagway sa iyang mga tawo nga di na epektibo sa iyang pangatungdanan tungod kay gawas nga edad-edaran na, aduna usab siyay gibati sa iyang lawas.
Way plano nga moluwat sa iyang katungdanan, gani naglaraw pa nga magpasubli kon dunay piniliay. Ang mga tawo sa iyang barangay naglungotlungot sa tumang kasagmuyo.
Sa pikas lungsod, dunay barangay nga ang konsehal wa na sab mag-akatar sa mga katawhan. Napuno sa mga pagduda ug bati nga alegasyon. Motunga sa barangay nga igo na lang mokubra sa iyang honorarium.
Sa habagatang bahin, usa ka barangay hall ang perming way tawo. Ang mga kataga balangay nga unta mangayo og gamayng tabang ngadto sa ilang mga pinili perming mahikawan tungod kay way masangpit ug kasumbongan unta sa ilang panginahanglan.
Sa laktod nga pagkasulti nalingla sila sa pasalig sa niaging piniliay. Gumikan niini, nitimbakuwas ang ilang kaalerto.
Gipukaw ang ilang paglaom. Sa Oktubre, duha ka bulan gikan karon, gikatakda na ang piniliay sa Sangguniang Kabataan ug sa barangay.
Gusto nila nga sa ilang mga boto mahashasan na gyud ang mga tawo nga sa tinud-anay moserbisyo. Ibilin ang mga buotan ug iwahing ang mga di mapahimuslan.
Apan daw sa kalit lang motidlom ang ilang paglaom sa dihang dunay mga kongresista nga gihapon namolitika. Mipalabang og resulosyon nga iuswag ang eleksiyon.
Kon kaaprubahan sa balay balaoranan, mahataas ang mga pag-antos sa taga balangay nga unta sa kausaban nangindahay.
Sa samang higayon, nagkatawa ang mga mapahimuslanon sa kahigayonan kay daw sa giluwas man sila sa pipila ka mga kongresista.
Ang rason nga way kwarta ang panudlanan nga ikagasto sa maong piniliay lisod tuohan sa
katawhan kay alang kanila ang grabing pamulitika mao gyud ang tinubdan sa pag-uswag ning tanan.
Sa makausa pa gihikawan ang katawhan. Only in this democratic country, the Philippines.