MERKADO publiko sa dakbayan sa Lapu-Lapu kuyaw nga mahugno kon di biyaan sa mga manindahay sa labing dali nga panahon.

Gumikan niini, si Mayor Paz Radaza nimando sa mga manindahay nga mobalhin na sa labing dali nga panahon.

Updates on President Benigno Aquino III's presidency

Apan pipila sa mga manindahay ningpadayag sa ilang kahingawa nga pamaagi lang kini sa Lapu-Lapu City Hall aron hingpit na kining magamit sa laing katuyoan.

Gusto ni Radaza nga sunod semana mahawan na ang merkado aron masugdan na ang pag-ayo niini ilabi na sa fish section nga grabe na ang kagabok.

Siya nipahibawo nga iya nang nadawat ang report sa engineering department ug base sa ilang rekomendasyon nga bakantihan na ang merkado sa barangay Poblacion tungod kay kon padayon kining gamiton kuyaw nga mahugno.

Matod sa mayor nga kon wa silay aksyon nga buhaton sila unya ang basulon kon adunay mahitabo ug labaw nang di siya makatugot nga mabutang sa peligro ang mga mangumprahay.

Giklaro niya nga gusto niyang ibalhin ang tanang mga manindahay sa merkado ngadto na sa ilang gitukod unta nga merkado nga wa pa mahuman hangtod karon sa may Muelle Osmena Wharf.

Kagahapon sa buntag naabtan pa sa Sun.Star Superbalita ang pipila ka mga manindahay nga nagtarong pa sa ilang mga puwesto.

Apan ang mga manindahay og karne niingon nga di nila hingpit nga biyaan ang karaang merkado.

Hinuon mobutang lang silag tindahan sa balhinang merkado tungod kay sigun sa ilang nasayran ang isdaan lang maoy gabok na kaayo ug angay balhinan.

Si Gabriel Naldoza, presidente sa meat section, niingon nga aduna silay mga suki apan kon sa ilang buhaton maalkansi man sila,resgo na kini sa ilang pagpaninda.

Hinuon si Maria Elena Caballes, market and abattoir supervisor, niingon nga iya unang pakig-estoryahan si Radaza kon unsa gyoy plano sa siyudad kon hingpit bang hawanan sa tanang manindahay ang karaang merkado aron ayuhon o ba kaha ihinayhinay lang sa pagbalhin.

Matod ni Caballes nga kon ibalhin ang tanan di paigo ang lugar tungod sa kagamay ra niini.

Apan kon maoy gusto sa mayor nga hawanan gyod ang merkado andam sila mopatuman.