NAIGO ang duha ka mga baga ug kasingkasing sa usa ka engineer nga gi-ambush sa duha ka mga tawo niadtong Huwebes sa gabii sa may Sityo Tigbao, Brgy. Talamban, dakbayan sa Sugbo.
Mao kini ang hinungdan sa kamatayon ni engineer Ceriaco Salazar, matod ni Dr. Nestor Sator, medico-legal officer sa PNP Crime Laboratory 7.
Siya niingon nga usa sa duha ka mga bala niigo sa wala nga braso ni Salazar dayon nidiretso sa iyang wala nga baga ug nilapos ngadto sa kasingkasing sa wa pa sab moigo sa iyang tuo nga baga.
Ang ikaduhang bala niigo sa iyang wala nga ilok ug niigo sab sa iyang wala nga baga sa wa pa moungot sa iyang dugokan, dugang ni Satur.
Ang duha ka mga bala nagpabilin sa lawas ni Salazar dihang siya gidala sa North General Hospital.
Kini samtang trabaho ni Salazar isip head sa 4th engineering district sa Department of Public Works and Highways (DPWH) maoy usa sa mga anggulo nga gisubay sa kapulisan sa dakbayan sa Sugbo ning pagbanhig kaniya.
Matod ni Cebu City Police director Sr. Supt. Patrocinio Comendador nga gisusi na karon sa ilang mga imbestigador ang anggulo nga pagkasakop ni Salazar sa bids and awards committee sa DPWH-7.
Matod pa niya nga giestablisar nila karon ang teyuriya nga may kalambigitan ra sa trabaho sa biktima ang pag-ambush kaniya.
Iyang gibahin-bahin niya ang iyang mga sakop sa pagpahigayog imbestigasyon.
Duna siyay gitahasan sa pagkuha sa pamahayag sa pamilya niini.
Mokooperar usab sila sa kadagkuan sa DPWH ingon man sa mga kauban niini sa trabaho aron pagkuhag dugang impormasyon nga makatabang sa ilang imbestigasyon sa kaso.
Lakip sa ilahang susihon ang mga proyektong gipatuman sa biktima diha sa 4th engineering district office.
Ang anggulo sa personal wa gisentro sa kapulisan sanglit wa man usay bisyo ang biktima.
“Usa sa atong gitan-aw kay ang iyang lifestyle, but so far sa akong nadunggan wa man siyay bisyo,” matod niya sa Sun.Star Cebu sa usa ka phone interview.
Wa isalikway sa kapulisan nga gun-for-hire ang mga killer.
Si Salazar ug ang iyang asawa nga si Dolores padung sa ilang balay sa Villa del Rio I sa Barangay Bacayan dihang usa ka motorsiklo nga gisakyan sa duha ka mga tawo nitupad sa driver’s side sa sakyanan sa biktima.
Ang angkas sa motorsiklo maoy nipusil kang Salazar. Wa maunsa ang iyang asawa.
Mga imbestigador sa Homicide Section naka-recover sa tulo ka empty shells gikan sa usa ka .45 caliber pistol sa karsada ug usa ka slug sa sud sa sakyanan.
Usa ka tawo nga nagpuyo duol sa crime scene niingon nga nakadungog siyag tulo ka mga buto sa armas. Nakadungog sab siyag siyagit sa babaye.
“Nagtuo gani ko sa sud nagpunisilay. Ang patay among gipada sa ospital,” matod sa lalake sa usa ka taho sa CCTN.
Sa wa pa ang insidente, si Comendador nimando sa Mobile Patrol Group asa pag-focus sa mga motorsiklong dunay mga angkas.
Gipa-intensify nako ang pagtan-aw sa motorcycle nga naay duha ang sakay,” dugang ni Comendador.
Subay niini, niapilar si Comendador sa mga negusyante, opisyal sa gobiyerno ug individual nga kon duna silay hulga sa kinabuhi gikinahangalng ilang i-report sa kapulisan ingon man mokuha silag police escort.
Samtang ilaha usab nga usbon ang pattern sa ilang mga lakaw isip kabahin sa pag-secure sa ilang kaugalingon batok sa mga kriminal.
Nunut niining mga pagpang-ambush nga nangitabo didnhi sa Sugbo, gimando ni Comendador sa iyang mga sakop ang paghingusog sa pagpahigayon og checkpoints. (GPL)