NADAKPAN na sa kapulisan sa usa ka operation ang gitumbok nga lookout sa pag-ambush patay kang kanhi Compostela Mayor Joselito “Cocoy” Reynes niadtong Lunes sa gabii diha sa Brgy. Estaca sa nahisgutang lungsod.
Si Dominador Villoria Sr., 54, habal-habal driver, lumad nga taga Tagum, Davao del Norte nadakpan nila ni Chief Insp. Romeo Santander, hepe sa Regional Special Operations Group (RSOG-7) didto sa balay niini sa Brgy. Molao, Compostela kagahapon sa alas 30 sa kadlawon.
Hinuon si Villoria nanghimakak sa mga pasangil batok kaniya.
Si Dominador nakuhaag armas nga .357 caliber revolver ug upat ka mga bala dihang mosukol unta sa kapulisan.
Lakip sa gisikop ang iyang anak nga si Dominador Jr., 23, kinsa nakuhaag kalibre .45 uban sa lima ka mga bala.
Si Santander nagkanayon nga si Dominador Sr. positibong gitudlo sa lima ka mga testigos nga maoy lookout sa pagpang-ambush, gikan sa pagsugod sa krimin hangtod pagpusil sa biktima.
Hinungdan nga kagahapon sa kadlawon nipahigayon silag surveillance sa gipuy-an ni Dominador Sr. alang na sa ila untang pagkuhag search warrant tungod kay duna kiniy mga armas ug grupo sa lugar.
NAKABANTAY
Sa ilang pag-abot sa lugar nga nahimutang sa bukirang bahin sa lungsod, si Dominador Sr. diha sa gawas sa ilang balay nagbitbit sa .357 nga armas ug nikidlap kini.
Apan nakabantay siya sa presensya sa kapulisan mao nga nibalik siya sa pagsulod sa balay.
Diha-diha giduol nila ni Santander ang balay ug gituktok ang pulthan dayon nipaila sila nga mga pulis, apan nagmagahi ang suspek hinungdan nga napugos sila pagguba sa pultahan.
Apan dihang nakasulod ang mga pulis, nagti-on na kanila si Dominador Sr. hinungdan nga nahitabo ang linayugay sa sulod ug ilang na-neutralize ang suspek.
Matod ni Santander nga wa nila binuangi ang suspek ug legal ang ilang operasyon sa pagdakop.
Wa usab sila makapabuto sa ilang armas didto sa sulod dihang naglinayugay sila.
Gi-respito nila si Dominador, iyang anak nga 10 anyos ug asawa.
Apan ang anak nga si Dominador Jr. gidakop nila pag-apil human nakuhaag armas samtang hubog niadtong higayuna diha sa luyo sa balay.
Dugang nakuhang impormasyon nilang Santander nga si Dominador Sr. nahimong job-order nga empliyado sa munisipyo sa Composteala isip driver sa ambulansya niadtong Agusto sa miaging tuig.
Dunay mga tawo nga ni-reklamo niini ingon man sa mga anak niini nga nalambigit sa mga pagpanghulga sa ilang dapit.
Gawas niini, dunay grupo nga gun-for-hire si Dominador Sr. sa ilang lugar.
LEGITIMATE
Gipasabot ni Santander nga ang pagkwestyon karon sa pamilya labot sa ilang pagkadakop kang Dominador Sr.adto nalang unya nila tubagon sa korte sanglit usa kini ka legitimate operation.
Gisiguro gyud nila kagahapong adlawa ang pagsignit niini sanglit sagad sa mga silingan niini dunay mga armas.
Sayo kagahapon sa buntag ang asawa niini nga si Lucia, 50,nireklamo sa dySS Super Radyo tungod kay ang iyang bana nga di Dominador Sr. ug anak nga si Dominador Jr. gidakop nga walay warrant of arrest ingon man search warrant.
Gibutyag ni Lucia nga kapin sa 10 ka nagpailang mga police gikan sa Police Regional Office (PRO-7) ang nisignit sa iyang bana apan dihang iyang gikwestyon way gipakitang warrant of arrest ingon man search warrant.
Gani nangaguba pa gayud ang ilang mga butang ug pultahan sa balay atol sa pagsulod sa mga pulis diin silang tulo sa iyang bana ug anak gipugos sa pagpatug-an sa ilang nasayran sa kamatayon ni Reynes.
Usa sa mga pulis nga wa nag-unipormi nisanta kaniya nga di maglangas kay gidala ang iyang bana kay sad-an.
Hinuon giangkon ni Lucia nga ang .357 nga armas gipagnag-iya sa iyang bana isip depensa sa kaugalingon.
Gibutyag usab niini nga si Wilson Pasaul, higala sa iyang bana sanglit nakauban kini sa trabaho sa munisipyo isip driver sa ambulansya.
Pagka-alas 6 sa buntag dihang gibuhian siya aron pakuhaog mga sinina sa iyang bana ug anak, inay mopauli sa ilang balay nidiretso siya sa dySS Super Radyo pagpangayog panabang.
'BAKAK’
Si Dominador Sr. nga nahinabi mga tigbalita hugtanong nanghimakak sa pasangil nga siya maoy lookout sa pagpatay kang Reynes.
“Ngano gud tawon… Dili na tinuod. Ako nanginabuhi lang ko alang sa ako amilya. Nag drive ko og habal-habal. Wala man ko mag-pil-apil anang pulitika,” sumala pa ni Dominador Sr.
Giklaro niini nga atol sa krimen didto siya sa kilid sa munisipyo dapit police station nagtan-aw og telibisyon human sa gipahigayong nobena.
Gani dunay mga pulis nga nakakita niya didto nga naghigda-higda siya sa lugar.
Samtang di usab ilang ang armas ang nakuha.
Nahibulong na lang siya dihang kalit silang gironda sa kapulisan ug siya mismo ang gibagnos sa sawog ug wa gyud mosukol.
Si Atty. Rex Fernandez, abogado ni Dominador Sr., nibutyag nga karong adlawa mo file siyag petition sa korte nga habeas corpus tungod kay usa ka illegal arrest ang gihimo sa kapulisan.
Matod pa ni Fernandez, nga violation of domicile ang gihimo sa mga pulis.
Gawas niini, maisip sab nga arbitrary detention ug torture sanglit gi-blindfold si Dominador Jr. ingon man makiha ang mga pulis og child abuse gumikan kay gihimo kini sa mga pulis atubangan sa 10 anyos nga anak ni Dominador Sr.