USA ka asset sa pulis ang gipusil sa mga armadong grupo sa alas 4:00 sa hapon niadtong Biyernes didto sa probinsiya sa Sultan Kudarat.

Nailhan sa kapulisan ang biktima nga si Vernon Domingo, 44, minyo ug molupyo sa Barangay Poblacion, Palimbang sa maong probinsiya.

Sa nahagpat nga taho gikan sa Sultan Kudarat Police Provincial Office, pagawas ang biktima sa merkado publiko sa Palimbang sa diha nga giatngan sa duha ka wala mailhing tawo ug gipusil gamit ang kalibre .45 nga pistola.

Patay gilayon si Domingo nga naigo sa dughan ug tangkugo nga milapos sa ulo samtang ang mga mamumuno dali nga misibat sakay sa XRM nga motorsiklo paingon sa wala matino nga dapit.

Si Susan, asawa sa biktima, nagbutyag nga una gipatay ang iyang bana dunay nakabingkil kining grupo gumikan sa pagpayuhot sa ginadiling druga sa Palimbang.

Mismo ang mga paryente ni Domingo miangkon nga siya sagad makit-an nga nag-uban sa mga pulis, apil na sa mga sakop sa Philippine Drug Enforcement Agency (PDEA 12) sa ilang operasyon batok sa mga tawo nga nalambigit sa druga.

Hangtud karon blangko pa ang kapulisan sa posibling mga suspetsado nga mipatay sa biktima. (Edgardo Fuerzas)