DEAD on the spot ang usa ka wa mailhing kawatan human mibusikad ang iyang dalang granada nga buot niyang ilabay sa migukod kaniya nga mga pulis sa alas 3:20 sa kaadlawon kagahapon didto sa Mabini kanto Arellano Street, siyudad sa Davao.

Naputol ang wala ug tuong kamot sa namatay ug nakaangkon og daghang samad sa iyang kalawasan dihang giugkat iyang patay'ng lawas sa mga operatiba sa Scene of the Crime Operatives (Soco)-Davao Region.

Si Police Chief Inspector Caezar Cabuhat, hepe sa San Pedro Police Station, nagbutyag sa ilang spot report nga ang suspetsado way dokumento nga magtug-an sa iyang pagkatawo mao nga ilang gipaabot nalang ang kabanay nga moadto sa Angel Funeral Homes, dalang F. Torres, ning siyudad.

Matud ni Cabuhat nga ang namatay gigukod sa mga sakop sa City Mobile Group (CMG) human niya gitulis si Moczing Macaraya, 17, nagpuyo sa Isla Verde, Barangay 23-C Poblacion, ning siyudad.

Giingon nga naglakaw si Macaraya didto sa dalang Arellano apan kalit siyang giduol sa wa mailhing suspetsado ug pugsanong gikuha ang iyang cellular phone apan nakahimo pagtawag ang biktima sa Central 911.

Tungod sa maong police assistance, miresponde ang tulo ka mobile patrol sa kapulisan ug didto ilang gipangita ang suspetsado kinsa mitago sa bunkhouse ni Roland Gallardo didto sa Arellano Street.

Si Cabuhat nagbutyag nga gisuwayan pagkombinse sa mga pulis nga moampo nalang ang suspetsado ngadto kanila apan nagdumili siya dayon giibot ang safety lever sa granada aron ilabay ngadto sa mga pulis.

Mga pulis nga miresponde sa maong hitabo nanalipud sa iyang kaugalingon mao nga ilang gipabuthan ang suspetsado ug tungod sa kahadlok wa niya malabay ang granada hinungdan nga siya ang nabuthan ug namatay.

Nakuha sa mga otoridad ang upat ka MK2 grenade gikan sa poder sa namatay ug atua karon sa kustodiya sa Bomb Squad sa Davao City Police Office (DCPO).

Makuting imbestigasyon ang gihimo karon sa kapulisan aron mailhan ang suspetsado.

Sa laing bahin, usa ka babaye ang namatay human siya gidunggab sa iyang silingan sa alas 7:45 sa gabii niadtong Biyernes.

Ang biktima mao si Marife Orantak, 30, minyo; samtang ang suspetsado mao si Musa Turunan, pulos nagpuyo sa Barangay 31-D Poblacion, siyudad sa Davao.

Si SPO2 Cesar Robles sa Sta. Ana Police Station nagbutyag nga nagpahulay ang biktima sa gawas sa ilang balay apan kalit siyang giduol sa suspetsado ug gidunggab tumong sa dughan.

Ang biktima daling gidala sa Southern Philippines Medical Center (SPMC) apan gideklara nga patay na dihang miabot sa tambalanan.

Gipangita karon ang suspetsado sa kapulisan aron sikupon ug pasakaan og kaso ngadto sa korte. (Alger Dura)