NAGPANIKAD na si World Boxing Organization (WBO) minimumweight champion Donnie “Ahas” Nietes alang sa iyang ikalimang pagdepensa sa korona batok kang Mexican Mario ‘El Dragoncito’ Rodriguez karong Agusto 14 sa Mexico.
Si Nietes kauban ang iyang trainer nga si Edmund Villamor niabot sa Amerika sa miaging semana padayon karong nag-ensayo sa Wild Card gym ni Freddie Roach sa California.
Hinuon dili na kayo grabe ang ensayo ni Nietes apan sa iyang pag-punch mitt kang Villamor, giingong naa gyud ang kaabtik, kaandam ug kusog sa boksidor sa ALA Promotions.
“Nagpanikad,” matod pa ni Nietes sa interbyu ni Dong Secuya, ang nagmugna sa www.philboxing.com ug www.mannypacquiao.com.
Si Villamor nagkanayon nga andam na gyud kaayo si Nietes, kinsa adunay 26-1-3, 15KOs nga rekord.
Ang manager ni US-based Mercito Gesta nga si Vince Parra nakadayeg gyud og maayo sa estilo ni Nietes.
“I like him and I like his style,” matod ni Parra. “He reminds me very much of [former WBO bantamweight champion] Cruz Carbajal in his prime who I trained before. The way he uses his footwork, he is always ready to unleash those power shots and that is very difficult to do. His style is very different from the Filipino fighters that I saw.”
Gikatakdang moapas sa Amerika sila si ALA Promotions Vice-President Dennis Canete ug ALA chief trainer Edito Villamor aron paghatag kang Nietes og dugang suporta.
Ang grupo ni Nietes molarga paingon sa Mexico karong Huwebes (RP time) atol sa official press conference sa away.