Mga duwa karon:

1:00 pm- CIT batok USPF (jrs)

2:30 pm- DBTC batok SHSJ-Ateneo (jrs)

4:00 pm- DBTC batok USPF (srs)

5:30 pm- UC batok SWU (srs)

NAPAMATUD-AN sa University of San Carlos (USC) Warriors nga bisan pito ra ang ilang mga magduduwa, kaya nilang molahutay pinaagi sa pagpukan sa University of San Jose Recoletos (USJ-R) Jaguars, 76-75, sa main game niadtong Biyernes sa 2010 Cebu Schools Athletic Foundation Inc. (CESAFI) college division sa Cebu Coliseum.

Updates on President Benigno Aquino III's presidency

Sa pagpangulo nila ni Cid Cortes, Sam Hermosa ug Nilton Otida, ang Warriors ni coach Mike Reyes sayong ningkontrolar sa duwa ug nakaposte dayon kini’g 29-14 nga labaw sa 2nd quarter.

Unya ang ubang nahabiling mga magduduwa sa Warriors nga sila si Miko Santos, Chino Uy, Robert Codilla ug Mark Panerio nakahatag sab gyud og kontribyusyon sa matag sulod nila sa korte.

Tungod niini, hayan nagpadayon ang kainit sa Warriors hangtod nga naposte nila ang ilang labing dakong labaw, 59-37, sa hinapos nga bahin sa 3rd quarter.

Apan sa 4th quarter, tatawng gikapoy na sab gyud ang pito ka mga sakop sa Warriors hilabi na kay nagsige na lang og trapping defense ang Jaguars ni coach Edito Salacut.

Pila ra’y dagan sa estorya, nakasikit gyud pagbalik ang Jaguars, 73-75, sa nahabiling unom ka segundos.

Nainat og gamay ni Otida ang labaw sa Warriors pinaagi sa iyang split freethrow, 76-73, sa nahabiling tulo ka segundos.

Wa pa dayon misurender ang Jaguars ug bisan sa gamitoyng oras, napasulod pa gyud ni Jomar De La Peña ang iyang kuwestiyunableng tira dapit sa three-point area.

Sa pagtuo nga usa kini ka three-point shot, hayan puwerteng hugyawa sa mga sakop sa Jaguars ug nagdahom na sila nga adunay overtime.

Apan human sa panaghugpong sa tulo ka mga referee, ilang nadesisyunan nga dos puntos ra ang maong itsa ni Dela Peña sa rason nga nakataak kini sa linya.

Puwerteng sukoa ni coach Salacut ug nagsiyagit siyang mireklamo sa desisyon sa mga referee apan wala ra gihapon kini nakapausab sa desisyon.

Ang Warriors aduna nay 1-1 nga baraha samtang ang Jaguars nakaangkon sa ikaduha nilang sunodsunod nga kapildihan.

Sa laing duwa, naangkon sa 9-time champion University of the Visayas (UV) Green Lancers ang solong liderato human nila gipangbuntog ang Cebu Institute of Technology (CIT) Wildcats, 84-75.

Ang Green Lancers aduna nay 2-0 nga rekord samtang ang Wildcats natagak sa 1-1.

Puntos kada usa

UV (84)- Lao 22, Calo 13, Olivares 11, Mercader 10, Cincoflores 8, Perolino 7, Abad 5, Delantes 4, Rios 4, Saycon 2, Villanil 2, Silva 2. CIT (75)- Curso 20, Ipang 17, Taboada 13, Cañete 13, Denso 5, Booc 4, Cabanero 4, Batiquin 1

USC (76)- Cortes 21, Hermosa 14, Otida 11, Codilla 10, Santos 10, Panerio 7, Uy 3. USJ-R (75)- Albarillo 18, Nudalo 14, Bibera 13, Dela Peña 9, Muñez 7, Abing 4, Amores 3, Tabaloc 3, Suliman 2, Lapiz 2.