Doy M. Abellana
Cebu City
NAGLINGI-LINGI si Ernie. Liraw iyang mga mata nga misulod sa sudlunong bahin sa usa ka barangay sa siyudad. Naandan na kini niyang buluhaton kon makakuwarta siya.
“Si Joshua anaa, Dong?” ni Ernie sa usa ka bata dihang haduol na siya sa dapit nga iyang tuyo. Dugay siyang gitutokan sa batang lalake nga mihangad kaniya.
u00c1y, prime na man diay ka dinhi, Noy, no? Taym pa, pahibaw-on ko si Noy Joshua!” matod sa bata nga abtik misulod sa pultahan sa usa ka balay. Taudtaod, migula ang upaw ug bigotelyo nga lalake nga nagtingsi sa pagkakita kang Ernie. Misibat dayon ang bata.
“Bay Josh! Giuhaw na sab ko!”
“Bay Ernie! Subra nas napulo ko ka mga suki nga nag-ulhos-ulhos pag-anhi karon. Dali, sulod kay kutawan tika!”
“Milk shake, Bay Josh! Milk shake!”
Dihang nakasulod na si Ernie sa hideout ni Joshua, gi-lock dayon sa naulahi ang pultahan.
“Pilay dalang wawart mo karon, Bay Ernie?” sukot ni Joshua. “Kaigo kaha sa usa ka kutaw?”
“Subra pa nis kutaw, Bay Josh. Nakasakiyo kog dos mil pesos sa hunos sa tindahan sa akong Mama. Payts na ni. Makadagundon pa tag bugnawng beer!”
“Aprob, Bay Ernie! Andaman tikag milk shake!”
Nagpanilap si Ernie nga nagtan-aw kang Joshua nga nag-andam sa naadikan niyang milk shake. Usa kini ka kumbinasyon sa shabu ug nubain nga maoy nauso na karong gamiton sa mga batan-on ug edaran nga adik sa paghithit sa ginadiling druga. Abtik nga nag-andam dayon si Joshua og shabu. Gibutang kini niya sa kutsara. Gidangdang sa layter. Dihang nalanay na ang shabu, gisagulan dayon kini niyag nubain. Unya, usa ka ‘syringe’ ang gipasuyop niini ni Joshua.
“Dali na, Bay Ernie! Andam na ang paborito mong milk shake. Itusok ko na kini sa imong lawas!”
NAMATIKDAN sa Papa Rudy ug Mama Sonia ni Ernie nga sabog gihapon siya sulod na sa lima ka mga adlaw nga kanunay lang naghigda sa iyang lawak.
“Ambot ning bataa! Morag na-overdose man nang imong anak sa ginadiling druga! Kanunay lang malahap ang halin diha sa hunos sa atong grocery, Rudy!”
“Sus, linugdangan na gyud ni sa pagka adik anang imong anak, Sonia, sa paghithit og shabu! Nagkurog-kurog man ang lawas ni Ernie, Sonia!”
Sa danag niyang kahimatngon nadungog ni Ernie ang panagsultianay sa iyang mama ug papa. Apan morag dili na gayud niya malihok ang iyang ulo. Bug-at na ang iyang ulo. Daw naughan sa tubig ang iyang utok nga maoy grabing ikamatayng epekto sa ‘milk shake.’ Miping-it si Ernie sa kasakit sa iyang ulo. Mikulismaot ang iyang nawong ug hugot niyang gipiyong ang iyang mga mata nga daw dili na niya mabuka niadtong mga taknaa. (KATAPUSAN)