MALIPAYONG gipakita ni Presidente Noynoy Aquino ang tseke sa iyang sweldo nga moabot lang og P63,000. Sa kadako sa iyang trabaho ug labad sa ulo, alang kanako, gamay lang gyud kining atong gi-sweldo sa atong pangulo.
Apan sa akong tan-aw, di ang sweldo ang gitan-aw ni P.Noy kon di ang oportunidad nga makapausab sa atong nasud subay sa mga prinsipyo nga iyang nakat-unan gikan sa iyang ginikanan ug sa pangandoy sa mayoriya sa katawhang Pilipino.
Tungod niini, nisamot ang pagdayeg kaniya sa ordinaryong mga tawo. Diha ko ni nakita sa grabing response sa Facebook post nga nagpakita sa hulagway ni PNoy nga malipayong nagpakita sa tseke.
Sa pagkakaron, mahimo na natong barometro sa sentimento sa mga ordinaryong mga Pinoy ang Facebook.
Ang ako lang kay angayang tan-awon ni P.Noy ang giingong legal nga mga benepisyo nga nadawat sa mga opisyal nga ubos-ubos og katungdanan kay daghan ang dagko kaayo og mga madawat matag bulan.
Kini pananglit ang mga ordinaryong sakop sa Mactan-Cebu International Airport Authority (MCIAA) giingong dunay P20 mil matag tigom. Kay duha ang ilang tigom matag bulan, duna silay tag-40 mil.
Apan dunay naapil sa maong ahensya sa kagamhanan tungod sa ilang katungdanan sa laing ahensya. Nagdawatan sab silag sweldo sa ilang inahan nga ahensya. Buot ipasabot, double compensation na.
Sa pagkakaron, ang atensya sa mga kadagkuan sa kagamhanan naa sa BIR ug Customs nga maoy nag-unang tigkolektag buhis. Sakto nga kini ang unang limpyuhon. Apan angayang sa ngadto-ngadto iapil na kining ubang mga ahensya.
Nakahinumdom lang ko adtong gisugilon sa usa nako ka kaila pipila na ka tuig nga milabay. Usa ka opisyal ang niiesplikar sa usa ka langyaw nga mas maayo na lang kuno nga siya ang makadawat sa suburno kay sa tarungon niyag kwenta ang buhis.
Niingon ang maong opisyal nga kon tarungon niyag kwenta ang buhis, kawaton lang sab kini sa ubang mga ahensya sa kagamhanan lakip na ang mga magbabalaod ug sa Malakanyang.
Ang ako lang kay gisugdan na karon ni Presidente Pinoy ang pagtuman sa iyang saad sa miaging kampanya nga pangusgan ang pagbatok sa pangurakot. Dako naa kaayo niyang kalampusan kon malimpyo niya bisan katunga lang ang kagamhanan sulod sa iyang termino.
Alang kanako, igo na kaayo kining kon makab-ot man.
Matod pa sa usa nako ka higala nga naa sa Bureau of Customs, abi nako og di gyud pwede maundang ang tinunto nga mga trabaho. Pwede man gyud siya basta lang dunay political will.
LEGAL
Sa ingon niini nga kahimtang karon, makaingon ko nga angayan nang ibubo sa mga negusyante ang ilang capital diha sa mga lehitimong mga transaksyon aron matarong pagdagan sa atong ekonomiya ug malikayan nato ang mga dislokasyon tungod niining pagkugod sa mga pangurakot.
Ang mga dagkong negusyante ug ilang mga bata-bata nga nagsalig lang gihapon sa binahinay sa mga tinunto nga pangwarta siguradong makulban sa kulon karong panahona.
Ug nakahibawo si PNoy nga naa nagpaluyo kaniya ang bagang duot sa katawhan.