GRUPONG Pro-Life International nisaway sa tinguha sa dakbayan sa Sugbo nga i-regulate lang ang operasyon sa lingam massage o spa inay i-ban ang operasyon niini sa siyudad.

Ang kanhi chairman sa Cebu City Anti-Indecency Board (Caib) Dr. Rene Josef Bullecer niawhag sa kagamhanan sa dakbayan sa Sugbo sa pagpasira sa mga massage parlor kansang pribadong bahin sa lawas sa tawo lakip nga i-massage.

Gikabalak-an nga mosangpot sa prostitusyon o nagtuo siya nga adunay extra service nga mahitabo.

Updates on President Benigno Aquino III's presidency

Kon adunay lingam massage alang sa kalalaken-an, nisugod na usab og tumaw ang Yoni massage alang sa kababayen-an, matod ni Bullecer.

Base sa talaan nga nahipos ni Bullecer nga sagad sa mga customer mo-avail sa maong matang nga masahe mga turista nga gikan sa mga silingang nasod sa Asya, samtang adunay mga local nga customer nga mo-avail usab sa lingam.

“Kon duna mo anang sakita (prostate cancer) duha ray inyong duolan, urologist ug psychiatrist. Dili ani nila (lingam massage parlor),” matod ni Bullecer.

Sa sayo pa, ang mga lingam massage operator nangangkon nga usa ka prostate cancer prevention ang ilang gitunol nga massage service.

Ang kagamhanan sa dakbayan sa Lapu-Lapu ug Mandaue city nisugod na sa pagpanggukod niadtong mga lingam massage operator sa ilang tagsa-tagsa ka mga hurisdiksiyon.

Ang probinsiya sa Sugbo mopahigayon og public hearing may labot sa ordinansa nga gipalabang alang sa total ban sa lingam massage sa tibuok probinsiya. (FVQ)