DUGAY na kitang nakahibalo nga bisan unsang butang nga sobra niining kalibutan makadaut.
Sobrang kaon makatambok ug magdala'g sakit nga alta presyon. Ang sobrang pag-inom og alak makadaut sa atay ug renyon. Kung maghinobra sab og basa sa Bibliya makadaut sab sama sa sobrang paghigugma.
May naghikog pa gani kay gibulagan sa ilang uyab nga way panutbras. Tungod sa kaguol, nakalimot nang mokaon busa natuliling ang maminsar. Pangutan-a gud silang Cita Maranan ug mga fans diha sa dietary section sa Mental Hospital di ba daghang nasulod sa single cell tungod sa paghinobra.
Apan may nasagap ako nga dokumento kabahin sa kadaut nga dala sa paghinobra sa pagtan-aw og TV.
Abi man gud nato nga kining gamay nga kahon nga gikalingawan nato'g tan-aw sa atong panimalay ug opisina dili magdala og kadaut sa atong panglawas ug sa kahimtang sa mga bata. Sumala sa panukiduki ni Katherine Westphal sa www.trashyourtv.com didto sa US nga adunay 10 ka butang nganong maghinayhinay na kita sa paglantaw og TV.
1) Ang mga tawo nga naglantaw og TV 3 ka oras matag adlaw may duha ka poruhang mahimong tabatsoy kaysa mga tawo nga nitan-aw lang og 1 ka oras matag adlaw.
2) Ang average nga mga ginikanang Amerikano naggahin lamang og 38 minutos matag semana sa pakig-estorya sa ilang mga anak samtang 31 oras matag semana nga molantaw og TV.
3) Ang paglantaw og TV sa mga batang nag-edad og 1-3 anyos adunay kalambigitan sa simtoma sa ADHD sa pag-abot nila og 7 anyos.
4) Ang paglantaw ug kabangis sa TV maoy pinakakusog nga basihanan sa pagka-agresibo sa kinabuhi unya, sumala sa usa ka long-term study.
5) Ang kabataan nakasaksi og 16,000 ka TV murders sa pag-abot niya'g 18 anyos.
6) Nakatan-aw ang katawhan og average 40,000 commercials matag tuig.
7) Ang commercials nga gipunting ang mga batang mamamalit kay mokabat og $300 billion o mga 1.4 trillion pesos matag tuig.
8) Ang mga estudyante nga molantaw og TV sa di molapas og 1 ka oras matag adlaw kay may dakong gradong nakuha sa achievement tests.
9) Maka-adik ang pagtan-aw og TV.
10) Ang average nga Amerikano motan-aw og TV sud sa 4 ka oras ug 35 minutos matag adlaw.
Dili ikalimod nga naapil na sa atong inadlaw-adlaw nga sistema sa kinabuhi ang pagtan-aw sa TV ilabi na natong mga Pinoy nga mahiligon kaayo sa balita ug soap opera.
Apan tingale karon lang kita makahibalo nga mao diay kini ang tinuod nga hulagway sa resulta sa atong kanunayng pagyampungad sa TV.
Dugang pa ni Katherine nga mas dakong dautang epekto niini sa atong kabataan.
Inay nga kanunayng mag-estorya ang mga ginikanan ngadto sa ilang mga anak, dili na hinuon kini mabuhat mao nga mangita na lang og laing kaestorya ang mga bata sa barkada.
Imbis nga mobasa og libro ug magtuon, dili na hinuon buhaton kay tua sa TV ang mata. Busa angayang tun-an natong mga ginikanan ang pag-regulate ang paglantaw sa TV ilabi na sa mga bata. Wa ra bay pagmahay nga mag-una.