NALATA ang ulo sa usa ka tawo human gibundakan og dakong bato sa iyang ka-board mate sa alas 10:00 sa gabii niadtong Sabado.

Ang biktima mao si Toto Galledo, 30, ulitawo, laborer ug nag-abang sa Ming's Boarding House didto sa Bougenvilla Street, Sarmiento Subdivision, Barangay Panacan, siyudad sa Davao.

Base sa imbestigasyon ni SPO2 Demetrio Palomar sa Sasa Police Station, ang biktima naghigda sa bangko sulod sa maong boarding house apan kalit siyang gibunalan og dos por dos nga kahoy ni Cesar Camelo.

Si Palomar nagbutyag nga human naigo ang biktima sa kahoy, nakadagan siya paingon sa gate sa maong balay apan gigukod siya sa suspetsado.

Tungod kay luya na ang biktima, naabtan siya sa suspetsado sa gawas ug didto gibunal-bunalan na sab siya.

Si Galledo giingon nga natumba sa yuta, hinungdan nga mikuha og bato ang suspetsado dayon gibundakan ang ulo nga miresulta sa iyang kamatayon.

Gisuwayan pagtabang ang biktima sa mga paramedics sa Central 911 apan gideklara siyang dead on the spot sa maong insidente.

Human nasiguro sa suspetsado nga patay na ang biktima, dali siyang mibiya sa crime scene aron di masikop sa mga otoridad.

Ang kapulisan nagtuo nga personal nga bangi ang motibo sa suspek nganong iyang gipatay ang biktima.

Samtang gisuwat ning maong balita, ang kapulisan nangita sab sa suspetsado aron sikupon ug pasakaan og kaso didto sa korte.

Sa laing bahin, nasikop na sa kapulisan ang usa ka suspetsado nga mipatay sa iyang silingan sa alas 7:45 sa gabii niadtong Biyernes.

Ang suspetsado mao si Musa Tucunon, 26, nagpuyo sa Purok 8, Barangay 31-D Poblacion, siyudad sa DAvao.

Si Tucunon gisikop sa kapulisan sa alas 10:00 sa gabii niadtong Biyernes human niya gidunggab patay si Marife Orantak, 30.

Sa pasiunang imbestigasyon sa Sta. Ana Police Station, ang biktima nagpahulay sa gawas sa ilang balay apan kalit siyang giduol sa suspetsado ug gidunggab sa dughan.

Ang biktima gidala sa Southern Philippines Medical Center apan gideklara siyang patay na dihang miabot sa tambalanan. (AD)