TULO na ang patay sa nahitabong pagpamanhig nga gihimo sa mga rebeldeng New People's Army (NPA) didto sa Sitio Marugasan, Barangay Colosas, distrito sa Paquibato, siyudad sa Davao sa alas 10:00 sa buntag niadtong Biyernes.
Sa pasiunang report sa SuperBalita, duha lamang ang namatay samtang upat ang nasamdan human gibanhigan ang convoy ni Datu Ruben Labawan sa Supreme Tribal Council for Peace and Development (SPCTPD).
Apan sa upat ka mga nasamdan, nakabsan sa kinabuhi ang usa kanila samtang gitambalan sa hospital sa alas 3:00 sa hapon niadtong Sabado, sigun ni Datu Labawan sa SuperBalita atol sa gihimong Joint AFP and IP Tribal Leaders Convention and Workshop didto sa 103rd Infantry Brigade sa Sto. Tomas, Davao del Norte niadtong Sabado.
Sa maong insidente, suma ni Labawan, namatay dayon iyang igsuon nga si Private First Class (Pfc.) Kimpio Labawan ug Pfc. Elansio Alonsagay, samtang nasamdan sila Johry Abolorio, Gloria Alarao, Aliberto Libayao ug Enocencio Masangcay namatay sulod sa tambalanan.
Si Labawan nagbutyag nga siya ang tumong sa mga rebelde sanglit siya ang giuna pagrapido samtang nagmaneho siya sa iyang motorsiklo sakay ang iyang asawa.
"Ako ang ilang target. Gusto nila kong patyon kay sa una gilabay ko og granada ug kagahapon ila kung gi-ambush," suma ni Labawan kinsa nagbutyag nga 30 ka mga rebelde ang nag-atang kaniya daplin sa kalsada.
Si Labawan gibanhigan samtang padung na sila sa 103rd Infantry Brigade aron motambong sa gihimong convention sa mga sundalo ug mga lumad nga nagkahiusa aron batokan ang insurhensiya sa siyudad sa Davao ug Davao del Norte.
"Dili pa buot ang Ginoo nga mamatay ko mao nga wa ko naigo sa mga bala. Sa akong paminaw, mora kog giputos sa hangin ug mihinay ang dagan sa motor dihang ila kong gisugat ug girakrakan," ni Labawan kinsa misaysay sa nahitabo kanila.
Dihang gipangutana kung mohunong ba siya sa iyang kampanya batok sa mga rebelde, si Labawan nagbutyag nga iyang ipadayon ang pakigbisog.
"Wala ko nahadlok, hinuon misamot ang akong kadasig nga magpadayon sa akong mga programa aron mamahawa na ang mga NPA sa Paquibato District," sumala ni Labawan.
Si Labawan usa sa mga tribal chieftains nga mitambong sa convention diin nila gihiusa ang tinguha nga moalsa batok sa mga rebelde nga maoy nakasamok sa ilang malinawon nga pagpuyo sa ilang yutang kabilin.
Ang maong convention gitambongan nila 103rd IB commander Brigadier General Eduardo del Rosario ug 10th Infantry Division commander Major General Jorge Segovia. (AD)