USA ka lalaki namatay human gitigbas sa anak sa iyang asawa sa unang bana didto sa Barangay Napungas, lungsod sa Asuncion, Davao del Norte Biyernes sa hapon.

Ang biktima nailhan nga mao si Renario Mango, hamtung ang panuigon ug molupyo sa susamang dapit.

Sa nakutlo nga report gikan sa Davao del Norte Police Provincial Office kagahapon, nasayran nga pasado alas 5:30 sa hapon samtang naghikay sa ilang panihapon si Mango sulod sa ilang balay uban ang iyang asawa ug ilang anak nga lalaki, kalit miabot ang anak sa iyang asawa sa unang bana nga si Bryan Deel Asignado, 21 ug gitigbas ang biktima gamit ang sundang.

Samad tinigbasan sa kalawasan ang nahiaguman sa biktima, hinungdan sa iyang hinanali nga kamatayon.

Ang suspek nga si Asignado mitahan sa iyang kaugalingon ngadto sa mga otoridad.

Kapulisan sa lungsod sa Asuncion mihimo dayon og dugang imbistigasyon sa hitabo.

Nasayran sab nga daang bikil ang nakitang motibo sa pagpanigbas.

Ang suspek gitanggong na karon sulod sa selda samtang kasong pagpatay gihikay na sa kapulisan batok kaniya. (Marvin Pineda)