GIGUKOD na sa mga sakop sa 39th Infantry Battalion (IB) ang mga sakop sa rebeldeng New People's Army (NPA) kinsa maoy suspek sa kamatayon sa usa nila ka kauban human nagtakos ang duha ka pundok, Biyernes sa hapon.

Nahitabo ang panagsangka didto sa bukirang parte sa lungsod sa Matanao, Davao del Sur ug napatay atol sa enkwentro mao si Corporal Cezar Bucol ug nasamdan sab si Private First Class Mario Buenafe.

Nagtagbo ang grupo sa gobyerno ug mga rebelde human nagpatrolya ang militar sa bukirang bahin sa Barangay Dongan Pekong, mga alas 3:30 ang takna sa hapon. Gikasugat nila ang wa pa matinong gidaghanon sa grupo ni Ka Jam-jam, giilang 'notorious kumander'.

Si Lieutenant Raul Villegas, lokal nga tigpamaba sa militar, nagpahayag nga gisuta sa kasundaluhan ang reklamo sa mga lumolupyo nga kanunay silang gihasi sa mga rebelde.

Pung ni Villegas nga napamatud-an nila ang taho human nasuta nga anaa lang sa palibot sa barangay nagpahipi ang mga rebelde.

Gipangita na sab nila ang mga nasamdang rebelde ug ang hayan namatay sa pinusilay.

"The enemy also suffered an undetermined number of casualties," sigon ni Villegas.

Labihan ang kaligutgot ug gikondena sa katawhan ingon man ang pamilya sa gipatay nga si Crisanto Banan, usa ka 'Balik-Loob' sa gobyerno ug gipusil atubangan mismo sa iyang pamilya didto sa maong barangay.

Napamatud-an sa kasundaluhan ning bag-o lang, padayong gisupak sa mga NPA ang Geneva Convention human ang usa ka menor de edad nitahan ngadto kanila d pa dugay.

Ang menor nikuyog sa usa ka mag-uuma sa lungsod sa Magsaysay, Davao del Sur, sa pagtahan sa ilang kaugalingon human napakyas sa ilang tinguha nga makatabang ang mga NPA.

Matod sa 39th IB nga d nila lung-an pagukod ang mga rebelde apan gisaad nilang andam silang modawat ugaling mobalik sa sabakan sa gobyerno ang mga NPA. (Orlando B. Dinoy)