NINGBAKOD gikan sa duha ka sunodsunod nga pagkapandol ang Sacred Heart School Jesuits-Ateneo de Cebu (SHSJ-AdC) Magis Eagles ug ilang gipahimungtan ang Don Bosco Technological Center (DBTC) Baby Greywolves, 84-61, kagahapon sa 2010 CESAFI high school division sa Cebu Coliseum.

Ang Magic Eagles, nga nasubhan og duha ka dakong kapildihan nagbangis gyud sa kinatibuk-ang duwa aron iposte ang labing una nilang daog karong tuiga.

Updates on President Benigno Aquino III's presidency

Sa pagpapangulo nila ni Adrian Muller ug Henry Asilom, ang Magis Eagles nakamugna dayon og 27-13 nga labaw pagkahuman pa lang sa first quarter. Gipangulohan ni Muller ang kadaugan pinaagi sa iyang 21 puntos samtang niamot og 15 puntos si Asilom.

Padayong nagbangis ang opensa sa Magis Eagles hangtod nga nainat nila ang ilang labaw ngadto sa 78-42 pagkahuman sa 3rd quarter.

Ang Baby Greywolves nakaangkon sa ikaduha nilang sunodsunod nga dagkong kapildihan.

Sa laing duwa, yano sab nga gipanglampornas sa University of Southern Philippines Foundation (USPF) Baby Panthers ang high school defending champion Cebu Institute of Technology (CIT) Wildkittens, 84-61.

Sa kadaugan, ang Baby Panthers miangkon sa sayong liderato bitbit ang 2-0 nga baraha samtang ang Wildkittens, nga nabunyagan og forfiet nga kadaugan batok UV Baby Green Lancers, natagak sa 1-1 nga rekord.

Tataw nga apektado kaayo ang Wildkittens kay pipila sa ilang mga sinaligan nga nagpakampiyon kanila sa miaging tuig wala na man sa pagkakaron.