KON atong tan-awon pag-ayo ang dayag nga kamatuoran sa hustisya sa nasod, makapangutana kita nga kanunay ba gyud kining pabor sa adunahan?

Sama pananglitan sa kaso sa lider sa kulto sa isla sa Dinagat ug karon napili nga representante sa maong isla alang sa Ubos Balay-Balauran nga si Ruben Ecleo, Jr.

Updates on President Benigno Aquino III's presidency

Nag-unang suspek siya sa linuog nga pagpatay sa iyang asawa nga si Alona Bacolod niadtong 2002 sa Sugbo. Samtang nagdagan ang kaso, ang pamilyang Bacolod gimasaker sa ilang gipuy-an sa dakbayan sa Mandaue.

Moabot og dul-an na sa usa ka dekada apan wa pa masulbad ang kasong pagpatay ni Bacolod ug sakop sa iyang kabus nga pamilya nga kanhi sakop sa Philippine Benevolent Missionary Association (PBMA) ni Ecleo.

Laing husay sa kaso sa Sugbo miaging semana wa madayon ug giuswag sa Agusto 25 human wa motunga ang akusado.

Padayong tanghaga kon kinsa ang mamumuno ug utok sa pagpatay ni Alona ug pipila ka sakop sa pamilyang Bacolod.

Samtang tungod sa paglaban sa maayong abogado, si Ecleo gawasnon karon human gitugotan sa korte nga makapiyansa og usa ka milyon ka pesos ubos sa pagtumbok sa kondisyon sa iyang panglawas nga giingong ‘walking time bomb,’ may sakit sa kasingkasing nga mobutohay sa di matagnang panahon ug dapit.

Si Ecleo napili nga kongresista taliwa sa iyang pagka ‘walking time bomb’ hinungdan sa kwestiyon sa prosekusyon nga buot ipakanselar ang iyang temporaryong kagawasan.

Hinuon, si Ecleo giisip nga way sala o enosente samtang wa pay pinal nga hukom ang korte sa iyang kaso.

Apan sa kinatibuk-an, tataw sa dagan sa kaso nga mituyok ang hustisya sa adunahan apan idlas sa usa ka kabus nga biktima.