NAPASOK ang ulo sa drayber sa motorsiklo ngadto sa ilawom sa awto nga nakabangga sa kaniya sa Barangay Basak, dakbayan sa Lapu-Lapu, pasado alas 3:00 kagahapon sa kaadlawon.

Patay dihadiha ang biktima ug ang nag-angkas lalabay sa layo.

Updates on President Benigno Aquino III's presidency

Gikataho nga ang awto gimaneho sa usa ka hubog nga Korean national nga angol usab sa insidente uban sa yang pasahero nga laing Koryano dihang nibangga ang ilang sakyanan sa usa ka poste ug ngadto sa usa ka tindahan sa dapit.

Si PO1 Virgilio Ontong, Jr. nga nahinabi sa Sun.Star Superbalita niila sa namatay nga usa ka Ismael Amodia, 35, minyo, ug taga sityo Ibabao, Basak, Lapu-Lapu      

Matod ni PO1 Ontong, ang namatay nagmaniho sa iyang motorsiklo nga nagpaingon unta sa dakbayan sa Mandaue ug nag-angkas kaniya ang sa usa ka Eusebio Mabanto Jr., 23, ulitawo ug taga lungsod sa Liloan.

Apan paghiabot sa may merkado sa Basak, kalit silang nadasmagan sa usa ka Nissan nga awto plate no. KEH-780 nga nagpaingon sa Barangay Marigondon sa samang dakbayan.

Ang awto gimaneho ni En-Geon Kim, 22, uban sa laing Korean national nga wa makuha ang pangan sa kapulisan.

Sa imbestigasyon sa awtoridad, ang awto gikataho nga ni-overtake sa laing sakyanan busa iyang nabanggaan ang kasugat nga motorsiko.

Ang angkas sa motorsiklo nga si Mabanto nalabay human sa hitabo samtang si Amodia napasok pa ang ulo sa awto nga nagdagan hinungdan sa pagkamatay  dihadiha.

Human sa hitabo, ang duha ka mga Korean national, lakip na ang angkas sa motorsiklo pulos nangaangol hinungdan sa pagkadangat sa tambalanan.

Nasayran gikan sa usa ka Korean national nga niadto sa Lapu-Lapu police station si Kim usa ka tourist guide dinhi sa Sugbo ug padayon pa usab nga nagtungha.

Basi sa paiunang pakisusi sa mga mananambal sa Lapu-Lapu District Hopsital, nasuta nga nakainom ang gikahapan hinuon nihimakak usab kini ngadto sa mga pulis nga siya hubog.